އދ ގެ އާންމު މަޖިލީހުގައި ބައިވެރިވުމަށް ރައީސް ޑރ މުހައްމަދު މުއިއްޒު ކުރެއްވި ދަތުރުފުޅުގައި އާދަޔާ ޚިލާފަށް ހައިރާންކުރުވަނިވި ކަންތައްތައް ފާހަގަވާ ކަމަށް ބުނެ ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހް ޖަމާލް ވިދާޅުވެއްޖެއެވެ.
މިގޮތުން މަލީހް އެކްސް އެކައުންޓްގައި ކޮށްފައިވާ ޕޯސްޓެއްގައި މިއީ މުއިއްޒު ޔޫ.އެސް އަށް ކުރައްވާ ފުރަތަމަ ދަތުރުފުޅުތޯ ވަނީ ސުވާލު އުފައްދަވާފައެވެ.
މި ދަތުރުފުޅުގެ ތެރެއިން ރައީސް މުއިއްޒުއާއި ރައީސް އޮފީހުގެ އަންޑަސެކްރެޓަރީ ސަހްޔޫނީންނަށް ވާގިވެރިވާ ވިޔަފާރިތަކުގެ އުފެއްދުންތައް ބޭނުންކުރާ މަންޒަރުގެ ވީޑިއޯ އާއި ފޮޓޯތައް ވަނީ ސޯޝަލް މީޑިޔާގައި ދައުރުވެފައެވެ.
މީގެ އިތުރުން، މުއިއްޒު ޕީއެސްއެމްގެ ކުރިމަތީ ނޫސްވެރިއެއްގެ ރޯލު ކުޅެފައިވާ ކަމަށް ބުނެ ގިނަ ބަޔަކު އަންނަނީ މި ދަތުރާއި ގުޅިގެން ސަރުކާރަށާއި ޚާއްސަކޮށް މުއިއްޒުއަށް ބޮޑެތި ފާޑުކިޔުންތައް އަމާޒުކުރަމުންނެވެ.
އިންޑިއާގެ ބޮޑު ވަޒީރު ނަރެންދަރަ މޯދީވެސް ޔޫއެސް އަށް މި ބައްދަލުވުމުގައި ބައިވެރިވުމަށް ދަތުރުކުރައްވާފައިވާ އިރު ދެ ގައުމުގެ ދެ ރައީސުންގެ އަމަލު ހުރި ގޮތާއި މެދުވެސް ސޯޝަލް މީޑިއާގައި ފާޑުކިޔާފައިވެއެވެ.
މަލީހްގެ ޕޯސްޓްގައި އިތުރަށް ވިދާޅުވެފައިވަނީ ރައީސް މުއިއްޒު ބްރޭކެއް ނަންގަވާ ޔޫއެސްގެ ތަންތަން ބައްލަވާލެއްވުމަށެވެ.
