ޑިވޮލަޕްމަންޓް ބޭންކެއް ގާއިމްކުރުމަކީ ކަން ދައްކަން މި ސަރުކާރުން ކުރަން އުޅޭ ކަމެއްގެ ގޮތުގައި, އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު ރަޝާދު ސިފަކުރައްވައިފިއެވެ.

ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން އަމްރު ވިދާޅުވީ ޑިވެލޮޕްމަންޓް ބޭންކަކަށް ވުރެ މިވަގުތު ރައްޔިތުންނަށް މުހިންމީ ކުދި ވިޔަފާރި ކުރިއަރުވައި ބޯހިޔާވަހިކަމަށް ފަސޭހައިން ފައިނޭންސް ހޯދޭނެ ގޮތްތަކެއް ކަމަށެވެ. ނަމަވެސް އެކަން ކުރުމުގެ ބަދަލުގައި ފެނިގެންދަނީ ބޭނުމެއް ނެތް ކަންތައްތަކެއް ސަރުކާރުން ކުރަމުން އަންނަތަން ކަމަށް އަމްރު ވިދާޅުވިއެވެ.

އަމްރު ވިދާޅުވީ ޑިވޮލަޕްމަންޓް ބޭންކެއްގެ ވާހަކަ ވަރަށް ބޮޑަށް ދައްކަމުން އައިސް ޑރ. މުހައްމަދު މުއިއްޒު އެތަނަށް ލައިސަންސް ހޯދުމުހެ ގޮތުން ޑޮކިއުމެންޓް ހަދާ ވާހަކަ ދައްކަމުން އަންނަ ކަމަށާ އަދި އޭގެ ފަހުން އެތަނުގެ ސީއޯގެ ވަނަވަރު ލިބުނު ވާހަކަ ފަހުން ހާމަކުރި ކަމަށެވެ. އަދި މިހެން ގޮސް ވަރަށް ގިނަ ސްޓޭޖްތަކަކަށް އެ ވާހަކަތައް އެބަ ދެކެވޭ ކަން އަމްރު ފާހަގަކުރެއްވިއެވެ.

އަމްރު ވިދާޅުވީ އެ ބޭންކު ގާއިމްކުރެވިގެން ދިއުމުން، ރައްޔިތުންނަށް އެކަމުންވާނެ ފައިދާއެއް މިހާތަނަށް ސަރުކާރަށް ބުނެ ނުދެވޭ ކަމަށާއި، ޑިވޮލަޕްމަންޓް ބޭންކުގެ ބޭނުން ރައްޔިތުންނަށް ކިޔައި ނުދެވޭ ކަމަށެވެ.

އަމްރު ވިދާޅުވީ ވިސްނަންޖެހޭނީ ސީދާ ރައްޔިތުންނަށް މިކަމުން ފައިދާވާނީ ކޮންކަމަކުންތޯ ބަލާ އެކަމެއް ކުރުން ކަމަށާއި، އަދި ކަމެއް ކުރުމުގެ ވާހަކަ ދެއްކުމަކީ ހައްލެއް ނޫން ކަން ވެސް އަމްރު ފާހަގަކުރެއްވިއެވެ.