ހުޅުމާލޭގެ ބިންތައް ބިޑަކާ ނުލައި ސަރުކާރަށް ނިސްބަތްވާ ބާރަށު ދާއިރާގެ މެމްބަރު އިބްރާހިމް ޝުޖާއު ނަންގަވައިގެން އުޅޭކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ތުހުމަތު ކުރައްވައިފި އެވެ.

ޑރ ޖަމީލް މިފަދައިން ވިދާޅުވެފައި ވަނީ އެކްސްގައި ކުރެއްވި ޕޯސްޓެއްގައެވެ.

އެގޮތުން ޑރ ޖަމީލް އިތުރަށް ވިދާޅުވީ މަގާމުގެ ނާޖާއިޒު ނުފޫޒު އޭގެ އެންމެ ފުންމިނަށް ބޭނުންކޮށްގެން ސިއްރު ސިއްރުން، ނުވަތަ ވަކި އަމިއްލަ ގޮތަކުން ހުޅުމާލޭގެ ބިންތައް ބިޑަކާ ނުލައި ވެރިކަން ކުރާ ޕީއެންސީގެ ބޮޑުން ޖަހައިގަންނަ ކަމަށެވެ.

އެގޮތުން އެކަން ކުރުމަށްް މިފަހަރު އެންމެ ކުރީގައި ހުންނެވީ ޝުޖާ ކަމަށް ވިދާޅުވެ، ޝުޖާ އުޅެނީ ވަރަށް އަވަސް އަރުވާލާފައި ވެހޭތާ ފެންނަގަންކަމަށް ޑރ ޖަމީލް ވިދާޅުވިއެވެ.

އޭގެއިތުރުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިންގ ޑިރެކްޓަރ ފަޒުލް ރަޝީދުގެ އަންހެނުންނަށްވެސް ގޯއްޗެއް ދީފައިވާކަމަށް ޑރ ޖަމީލް ވަނީ ވިދާޅުވެފައެވެ.

މިއީ ކޮރަޕްޝަންކަމަށް ވިދާޅުވެ މިކަން ތަހުގީގު ކުރެއްވުމަށް ޑރ ޖަމީލް ވަނީ އެންޓި ކޮރަޕްޝަން ކޮމިޝަން (އޭސީސީ) އަށް ގޮވާލާފައެވެ.

ރައީސް މުއިއްޒުގެ ވެރިކަން މިވީ ވައްކަން އިތުރު ގިޔަރަކަށް ޖައްސާލި ސަރުކާރަކަށް ކަމަށް ވިދާޅުވެ އެމީހަކަށް ހެދުނު އެއްޗެއް ހަދަން ލައިސަންސް ދީފައިވާ ކަމަށް ވެސް ޑރ ޖަމީލް ވަނީ ތުހުމަތު ކުރައްވާފައެވެ.