ރާއްޖޭން ބޭރުގެ ގައުމުތަކަށް ވަޑައިގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިތުރުފުޅުހައްދަވަމުން ގެންދަވާތީ ރައީސް އަބްދުﷲ ޔާމީން އަބްދުލްގައްޔޫމް ފާޑުވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައި ވަނީ ހޯމަ ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަދައްކަވަމުންނެވެ.

އެގޮތުން ސްރީލަންކާގެ ކުރީގެ ރައީސް ރަނިލް ވިކްރަމް ސިންއާ ބައްދަލުކުރައްވާ ރައީސް މުއިއްޒު ދެއްކެވި ވާހަކަފުޅެއް ރަނިލް ވަނީ ދާދިފަހުން އިންޓަވިޔުއްގައި ވިދާޅުވެފައެވެ. އެގޮތުން "އިންޑިޔާ އައުޓް" ކެމްޕެއިން އަކީ ރައްޔިތުންގެ ވޯޓު ހޯދަންވެގެން ރައީސް މުއިއްޒު ބޭނުންކުރެއްވި ކަމެއްކަމަށާއި ވެރިކަން ލިބުމުން މިހާރު އިންޑިޔާއާއެކު ގުޅުން ބަދަހިވެފައިވާ މަންޒަރު ފެންނަ ކަމަށް ވެސް ރަނިލް ވަނީ ފާހަގަކުރައްވާފައެވެ.

އެ އިންޓަވިޔުގައި ރަނިލް ދެއްކެވި ވާހަކަތަކަަށް އިޝާރާތްކުރައްވާ ރައީސް ޔާމީން ވިދާޅުވީ ރައީސް މުއިއްޒު ގޮސް ރަނިލްގެ އަރިހުގައި އެދެއްކެވީ އާދާއިގެ ވާހަކައެއް ނޫންކަމަށެެވެ.

ރައީސް ޔާމީން އިތުރަށް ވިދާޅުވީ ދާދިފަހުން ސްރީލަންކާގައި އޮތް ރިޔާސީ އިންތިޚާބްގެ ތެރެއިން ކެމްޕެއިން ކުރެއްވި އިރު ޕޯސްޓަރު ތަކުން ފެނިގެންދިޔައީ ރާއްޖެ އަށް ވީގޮތް ނުވުމަށްޓަކައި ވޯޓު ދެއްވުމަށް ބުނެފައިވާ ވާހަކައެވެ. އެމީހުން ރާއްޖެއަށް ވީގޮތޭ އެ މާނަކުރީ ރާއްޖޭގެ ރައީސާ ރައްޔިތުންނާ އެއްވެސް ގުޅުމެއް ނެތުމުން އެކަމާ ކަމަށް ވެސް ރައީސް ޔާމީން ވިދާޅުވިއެވެ.

ބޭރުގެ ގައުމުތަކުގައި ދިވެހިރާއްޖެ ޕޯޓްރޭ ވެގެން އަންނަނީ ފަހުރުވެރިވާ ފަދަ ގޮތަކަށް ނޫންކަމަށް ފާހަގަކުރައްވާ ރައީސް ޔާމިން ވަނީ ސަރުކާރަށް ފާޑުކިޔުން އަމާޒުކުރައްވާފައެވެ.