އެޗްޑީސީގެ އެމްޑީ ފަޒުލް ރަޝީދުގެ ގާތް ބަޔަކަށް ކޮރަލްވިލްގެ 9 ޓަވަރުގެ ބޭރު ރެނދުތައް ފިލުވައި، ކުލަލުމުގެ މަސައްކަތް ހަވާލުކުރީ އިންތިހާއަށް ބޮޑު އަގުގައިކަން ފަޅާ އެރުމުން ކުރީގެ ނައިބު ރައީސް ޑރ.މުހައްމަދު ޖަމީލް އަހުމަދު ފާޑުވިދާޅުވެއްޖެއެވެ.

ކުލަލުމުގެ މަސައްކަތް ނުއަގުގައި ހަވާލުކޮށްފައިވާ ލިޔުން އެކްސްގައި ހިއްސާ ކުރެއްވުމަށްފަހު ޑރ ޖަމީލް ވަނީ ފަޒުލްގެ އެ އަމަލު ވަރަށް ބޮޑަށް ކުށްވެރިކޮށްފައެވެ.

އެގޮތުން އެމަނިކުފާނު ވިދާޅުވީ އެޗްޑީސީ ތެރޭގައި ފަޒުލް ހިންގަމުންދާ ކަންކަން މިހުރީ ފެންނަން ކަމަށެވެ. ފަޒުލްވެސް އެންމެ ފަހުން ކޮރަޕްޝަން ހިންގަމުން އަންނާނީ ޑރ ޖަމީލް ވަނީ ވަރުގަދަ ސުވާލެއް ވެސް އަމާޒުކުރައްވާފައެވެ. އެގޮތުން ސަރުކާރު ހިންގާ މައި ޕާޓީ ޕީއެންސީ ތެރޭގައި ވައްކަމުގެ މުބާރާތެއް ފެށިގެން އުޅެނީތޯ އެމަނިކުފާނު ވަނީ އައްސަވާފައެވެ.

ތެދުވެރި އެކަކުވެސް ހަމަނެތްކަމަށް ފާހަގަކުރައްވާ ޑރ ޖަމީލް ވިދާޅުވީ ޕީއެންސީގެ ޗެއަރ ޕާސަން އަދި މަޖިލިސް ރައީސް އަބްދުއްރަހީމް އަބްދުﷲ (އަދުރޭ) ގެ ސަބަބުން މުޅި ފެންގަނޑު ތަޢައްޔަރުވެއްޖެކަމަށެވެ. ޑރ ޖަމީލް އެ މޭރަމުން އެ ވިދާޅުވީ އެ ޕާޓީ ތެރޭގައި ކޮރަޕްޝަންގެ އަމަލުތައް ހިންގެވުމުގައި އަދުރޭ އިސްވެ ހުންނަވާތީއެވެ.

އޭގެއިތުރުން މިޚިޔާނާތަށް ރައްޔިތުން ދުލެއް ނުދޭނެކަމަށް ވެސް ޑރ ޖަމީލް ވަނީ ޕޯސްޓްގައި ފާހަގަކުރައްވާފައެވެ.