ހުރިހާ ބާރެއް އޮވެގެންވެސް ކުށްކުރުމާއި އަމާންކަން ނަގާލުން އަދުގެ ސަރުކާރަކަށް ނުހުއްޓުވޭނެ ކަމަށް ކުރީގެ ދާހިލީ ވަޒީރު އުމަރު ނަސީރު ވިދާޅުވެެއްޖެ އެވެ.
އުމަރު މިފަދައިން ވިދާޅުވެފައި ވަނީ ރާއްޖެ ޓީވީގެ "ސުވާލަކީ" ޕްރޮގްރާމްގައި ވާހަކަދައްކަވަމުންނެވެ.
އެގޮތުން އުމަރު ވިދާޅުވީ ކުށްކުރުން ސަރުކާރަށް ނުހުއްޓުވޭ ސަބަބަކީ ވެެރިކަން ހޯދުމަށް ގޭންގުތަކަށް ފަންޑުކޮށްފައިވާތީއެވެ. ފަންޑުކުރުމުން ގޭންގުތަކުން ވަނީ ކެމްޕެއިން ވެސް ކޮށްދީފައިކަމަށް އުމަރު ވިދާޅުވިއެވެ.
ބޮޑު ތާއިދެއް އޮވެގެން ވެރިކަން ލިބުނު ނަމަވެސް ސަރުކާރު އޮތީ ގޭންގުތަކުގެ ދަށުވެފައި ކަމަށް ވިދާޅުވެ އުމަރު ވަނީ ބޮޑު ތުހުމަތެއް ކުރައްވާފައެވެ.
އުމަރު އިތުރަށް ވިދާޅުވީ ކުށްކުރާ މީހުން ރުއްސައިގެން ވެރިކަން ކުރަން އުޅެގެން ވެރިކަމެއް ނުކުރެވޭނެ ކަމަށެވެ. އަދި ވެރިކަމުގެ ދެވަނަ ދައުރެއް ވެސް ނުލިބޭނެ ކަމަށެވެ.
