ދުނިޔޭގައި މިހާރު ބޮޑެތި ހަނގުރާމަތައް ހިނގަމުންދާ މި ދަނޑިވަޅަކީ މިއީ އިންޑިއާ ސިފައިން ރާއްޖޭގައި ތިބުމުން ވެދާނެ ގޮތް ވަޒަންކޮށްލަންވީ ވަގުތު ކަމަށް ކުރީގެ ދާޚިލީ ވަޒީރު އުމަރު ނަސީރު ވިދާޅުވެއްޖެއެވެ.
އުމަރު މިފަދައިން ވިދާޅުވެފައިވަނީ އޭނާގެ ސޯޝަލް މީޑިޔާގައި ހިއްސާކުރި ޕޯސްޓެއްގައެވެ.
އުމަރު ވިދާޅުވެފައިވަނީ، މެދުއިރުމަތީގެ ހަނގުރާމައިގައި އެމެރިކާގެ އަސްކަރީ މަރުކަޒުތަކާއި އާލާތްތައް ހުރި ގައުމުތަކަށް، އެ ގައުމުތަކުން ހަނގުރާމައިގައި ސީދާ ބައިވެރިނުވި ނަމަވެސް ހަމަލާތައް އަމާޒުވަމުންދާ ކަމަށެވެ. މިއީ ރާއްޖޭގައި ތިބި ބޭރުގެ ސިފައިންނާ މެދު ފުންކޮށް ވިސްނާލަންވީ ވަގުތު ކަމަށް އުމަރު ފާހަގަކުރެއްވިއެވެ.
އުމަރު ވިދާޅުވި ގޮތުގައި، އިންޑިޔާއާއި އެހެން ގައުމަކާ ދެމެދު ބޮޑު ހަނގުރާމައެއް ފެށިއްޖެ ހާލަތެއްގައި، ރާއްޖޭގެ ތިން ސަރަހައްދެއްގައި ގާއިމުވެތިބި އިންޑިޔާގެ ސިފައިންނާއި އެމީހުންގެ އަސްކަރީ އާލާތްތައް ހުރި ރަށްތަކަށް ހަމަލާދޭނެކަމީ ކަށަވަރު ކަމެކެވެ. މިފަދަ ހާލަތެއް މެދުވެރިވެއްޖެނަމަ، އެ ހަނގުރާމައިގައި ރާއްޖޭގެ އެއްވެސް ބައިވެރިވުމެއް ނެތް ނަމަވެސް، އެތައް ދިވެހިންނެއްގެ ފުރާނަ ގެއްލި، ގެދޮރު ސުންނާފަތިވެ، ބިންތައް ބޭނުންނުކުރެވޭ ވަރަށް ހަލާކުވެގެންދާނެ ކަމުގެ އިންޒާރު އޭނާ ދެއްވިއެވެ.
މީގެ އިތުރުން، މިފަދަ ނުރައްކާތެރި ހާލަތެއްގައި ރާއްޖޭގެ އިގްތިސޯދުގެ މައިނާރު ކަމަށްވާ ޓޫރިޒަމް އާއި އެހެނިހެން ސިނާއަތްތަކަށް އިއާދަނުކުރެވޭ ވަރުގެ ބޮޑެތި ގެއްލުންތަކެއް ލިބިގެންދާނެ ކަމަށްވެސް އުމަރު ފާހަގަކުރެއްވިއެވެ.
ރާއްޖޭގެ ސަލާމަތާއި ރައްކާތެރިކަމަށްޓަކައި އިންޑިޔާގެ ސިފައިންނާއި އެމީހުންގެ އަސްކަރީ އާލާތްތައް ރާއްޖެއިން ފޮނުވާލުމަކީ ކޮންމެހެން ކުރަންޖެހޭ ކަމެއް ކަމަށް ޕޯސްޓު ނިންމަވާލައްވަމުން އުމަރު ފާހަގަކުރައްވާފައިވެއެވެ.
އުމަރު މިފަދައިން ވިދާޅުވެފައިވާއިރު އެމެރިކާ އިޒްރޭލާ ވާގިވެރިވެފައިވާތީ އިޒްރޭލުން އިރާނަށް ހަމަލާދިނުމުގައި އެހެން ގައުމުތަކުގައި ހުރި އެމެރިކާގެ އަސްކަރި ބޭސްތައް ބޭނުްނކުރަމުންދާތީ ހަމަލާގެ ބަދަލު ހިފުމުގެ ގޮތުން އިރާނުން ދަނީ އެ އަސްކަރީ ބޭސްތަކަށް ހަމަލާދެމުންނެވެ. އޭގެ ތެރޭގައި އަރަބި ގައުމުތައް ހިމެނެއެވެ.
