ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން އަމަލުކުރަމުންދަނީ ޑިމޮކްރަސީގެ ނަމުގައި ޑިމޮކްރަސީއާ އިދިކޮޅަށް ކަމަށް ކެލާ ދާއިރާގެ ކުރީގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.

ޝަރީފު މިފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުންނެވެ.

ރައީސް މުއިއްޒު ވެރިކަމަށް ވަޑައިގެންނެވުމަށް ރައްޔިތުންނަށް ވަރަށް އުންމީދީ ވައުދުފުޅުތައް ވެވަޑައިގެންނެވި ކަން ފާހަގަކުރައްވާ ޝަރީފު ވިދާޅުވީ ނަމަވެސް މިސަރުކާރުގެ މިހިސާބަށް އައިރު އެއްވެސް އުންމީދެއް މިގައުމުން ނުފެންނަ ކަމަށާއި، މިސަރުކާރުގެ ބޭފުޅުންގެ އަމަލުތަކުން ގައުމު އިގްތިސާދީ އަނދަވަޅަކަށް ވެއްޓޭ މަންޒަރު ފެންނަ ކަމަށެވެ.

ސަރުކާރުގެ ދަރަނި ބަހުސަކަށް ވެފައި ވަނިކޮށް ޝަރީފް ވިދާޅުވީ ކުރީ ސަރުކާރުތަކުން ލޯނު ނަގާފައިވަނީ ލޯނު ދެއްކޭނެ ފުރިހަމަ ޕްލޭންތަކާއެކު ކަމަށާއި، އަންނަ ސަރުކާރުތަކުން އެއަށް އަމަލު ކުރަންޖެހޭ ކަމަށެވެ. އަދި ލޯނު ނަގާފައިވަނީ ތަރައްގީގެ މަޝްރޫއުތަކަށް ކަމަށް ޝަރީފް ވިދާޅުވިއެވެ. ނަމަވެސް ރައްޔިތުންނަށް މިކަންކަން އޮޅުވާލުމަށް މިސަރުކާރުން މަސައްކަތް ކުރާ ކަމަށް ޝަރީފް ވިދާޅުވިއެވެ.

މީގެ އިތުރުން ރައްޔިތުންގެ މަޖިލީހުން ސަރުކާރު ޒިންމާދާރުކުރުވަން މަސައްކަތް ނުކުރާކަން ފާހަގަކޮށް ޝަރީފު ވިދާޅުވީ، މިސަރުކާރުން މަސައްކަތް ކުރަނީ ޑިމޮކްރަސީގެ ނަމުގައި ޑިމޮކްރަސީއާ އިދިކޮޅަށް ކަމަށެވެ. އެކަން ރައްޔިތުންގެ މަޖިލީހުން ފެންނަމުންދާ ކަމަށް އޭނާ ވިދާޅުވިއެވެ.

މި ސަރުކާރުން ދައްކާ ވާހަކަތަކާއި އަމަލުތަކާ ދިމާނުވާ ކަމަށާއި، އެކަމުގެ ގެއްލުން ރައްޔިތުންނަށް ވަމުންދާ ކަން ވެސް ފާހަގަކޮށް ޝަރީފު ވަނީ އިޒްރޭލްގެ ޕާސްޕޯޓު "ބޭން" ކުރުމުގެ މަސައްކަތުގައި ވެސް ރައްޔިތުންނަށް އޮޅުވާލުމަށް މިސަރުކާރުން މަސައްކަތް ކުރާ ކަމަށް ވިދާޅުވެފައެވެ.