"ސީ ލެވެލް ރައިސިންގ" އަކީ ދިވެހިރާއްޖެ ކަންބޮޑުވާން ޖެހޭ ކަމެއް ނޫން ކަމަށް ރައީސް މުއިއްޒު މީގެ ކުރިން އިންޓަވިއުތަކުގައި ވިދާޅުވެފައިވަނިކޮށް އދ ގެ 79 ވަނަ އަހަރީ ބައްދަލުވުމުގައި ވާހަކަދައްކަވަމުން ކަނޑުގެ ލޮނުގަނޑު އުފުލުމުގެ މައްސަލައިގެ ނުރައްކާ ބޮޑުވެފައިވާ ކަމަށް ވިދާޅުވުމުން ގިނަ ބަޔެއްގެ ފާޑުކިޔުން އަމާޒުވެއްޖެއެވެ.

މިގޮތުން، ޕީއެންއެފްއިން ބާއްވާ ފްރޮންޓް އޮފީސް ޖަލްސާގައި މިރޭ ވާހަކަދައްކަވަމުން ރައީސް ޔާމީން އަބްދުލްގައްޔޫމް ވިދާޅުވީ މާލެ ވަށައިގެން ބޮޑު ތޮށި ޖަހާފައި ހުރީ ކީއްވެގެން ކަން މުއިއްޒުއަށް އެގިވަޑައިނުގެންނެވި ކަމަށެވެ.

ކަނޑުގެ ލޮނުގަނޑު އުފުލުމުގެ މައްސަލައަކީ ރައީސް މަައުމޫނުގެ ވެރިކަމުގައި އެމަނިކުފާނު ސީރިއަސް މައްސަލައެއްގެ ގޮތުގައި ނަންގަވާ އަދި ފަހުން ރައީސް ނަޝީދުވެސް ވަރަށް ބޮޑަށް ވާހަކަ ދެއްކެވި މައްސަލައެއް ކަމުގައެވެ.

ކުރީގެ ރައީސުން މި މައްސަލަ އެހާ ނުރައްކާތެރި މައްސަލައެއްގެ ގޮތުގައި ނަންގަވާފައިވާއިރު، މުއިއްޒުއަށް އެއީ މައްސަލައަކަށް ނުވެ ދުނިޔޭގެ މީޑިޔާތަކުގައި ވާހަކަދައްކާ ވަނީ ރާއްޖޭގެ އަގު ވައްޓާލާފައެވެ.

މޫސުމަށް އަންނަ ބަދަލުތަކާ ގުޅޭގޮތުން، ޚާއްޞަކޮށް ކަނޑުގެ ލޮނުގަނޑު އުފުލުމުގެ ނާޒުކު މައްސަލައާ ގުޅޭގޮތުން ރައީސް މުޙައްމަދު މުޢިއްޒުގެ ވާހަކަ ބަދަލުވެ އާންމުންގެ ފާޑުކިޔުން ވަރަށް ބޮޑަށް ވަނީ އަމާޒުވެފައެވެ.