ވެރިކަމަށް ދިހަ މަސްވެގެންދިޔައިރު މި ސަރުކާރުގެ ނިފާގުކަން ދަނީ އެކި ކަންކަމުގެ ތެރެއިން ހާމަވަމުންނެވެ. އެގޮތުން ސަހްޔޫނީންގެ ޕާސްޕޯޓު މަނާ ކޮށްފި ކަމަށާ ދިވެހި ސަރުކާރު އަބަދުވެސް ދެމި އޮންނާނީ ފަލަސްތީނުގެ ރައްޔިތުންނާ އެކު ކަމަށް ބުނެ ސަރުކާރުން ގެންދަނީ ލައްކަ ޑްރާމާ ކުޅެ ބައިސާ ވެސް ކަނޑަމުންނެވެ.

އެގޮތުން ޕްރޮ މޯލްޑީވްސް ކަމަށް ބުނާ ޚާރިޖީ ސިޔާސަތުގެ ތެރެއިން ފެންނަ އެންމެބޮޑު ނިފާގު ކަމަކީ ރައީސް މުހައްމަދު ފަލަސްތީނުގެ މައްސަލައިގައި ވިދާޅުވާ ބަސްތަކާ އަމަލުކުރައްވާ ކުރެއްވުމޭ ދެންނެވުމަކީ ދޮގަކަށް ނުވާނެއެވެ. ސަހްޔޫނީންގެ ޕާސްޕޯޓާ ގުޅުވާ ދައްކަވާ ވާހަކަތަކީ އޭގެ އެއް މިސާލެވެ.

ކޮންމެ ވެރިޔަކު ހުއްޓަސް މި ދިވެހި ފަސްގަނޑުގައި ފަލަސްތީނަށް އޮތް ލޯތްބާއި ގަދަރު ނެތި ނުދާނެކަން އެއީ ތާރީހު ދައްކައިދީފައި އޮތް ހަގީގަތެކެވެ. އެހެންކަމުން ދިވެހިން ފަލަސްތީނާ އެކު ދެމި ތިބީ އިއްޔެއަކު މިއަދަކު ނޫންވެެ. މިއީ ޒަމާނުއްސުރެ ފަލަސްތީނު ރައްޔިތުންނާ އެކު ދެމި އޮތް ގައުމެކެވެ.

އެހެންކަމުން މި ސަރުކާރު އަބަދުވެސް ދެމި އޮންނާނީ ފަލަސްތީނު ރައްޔިތުންނާ އެކު އޭ ބުނުމަކުން ނުފުދެއެވެ. ފަލަސްތީނު ރައްޔިތުންނަށް ހަމަލާދީ ހިންގަމުންދާ ގަލްތުއާންމުގެ ތެރެއިން ސަހްޔޫނީންގެ ސިފައިން ޗުއްޓީ ހޭދަ ކުރަން އަންނަ "ރެގިއުލާ" މަންޒިލަކަށް ރާއްޖެ ހަދާފައިވާއިރު އެވެރިންގެ ޕާސްޕޯޓު "ބޭން"ކޮށްލަން ދިވެހިންގެ ވަލިއްޔުލް އަމްރަށް ނުކެރެމަކީ ދިވެހިން ލަދު ގަންނުވާލި ކަމެކެވެ.

ކުޑަކުޑަ ގައުމެއްގެ ގޮތުން ދިވެހިރާއްޖެއަށް ކުރެވެން އޮތީ ސަހްޔޫނީންގެ ޕާސްޕޯޓު "ބޭން" ކުރުން ފަދަ ކަންކަން ކަމަށްވީ ހިނދު ޕާސްޕޯޓެއް ބޭން ކުރުމަކީ ސީދާ ރައީސަށް އޮތް ބާރަކަށްވެފައި ރައީސް އެ ބާރުގެ ބޭނުން ނުހިފުމަކީ ސުވާލު އުފެދޭ ކަމެކެވެ. އެހެންކަމުން ރައީސް މީހާގެ ބަހާ އަމަލާ ދިމާނުވެއޭ ބުނަން މަޖުބޫރުވެއެވެ.

އެކަން ކުރެވޭނީ ގާނޫނެއް މެދުވެރިކޮށް ކަމަށް ބުނެ ހާސަރުދަމުންދާތާ 200 އަށްވުރެ ގިނަ ދުވަސްވެފައިވާއިރު އެކަން އޮތީ ސަރުކާރުގެ ސުޕަރ ސުޕަރ މެޖޯރިޓީ އޮތް މަޖިލީހުގައި ތާށި ކޮށްލާފައެވެ. ސަހްޔޫނީންގެ ޕާސްޕޯޓު މަނާކުރި ކަމަށް ބުނެ ދުނިޔޭގެ މީޑިއާތަކުގެ ފަލަ ސުރުހީން ޖާގަ ހޯދާ މެޑަލް ޖަހަމުންދާއިރު ރައީސް އޮފީހުގެ ވެބްސައިޓުގައި އެ ހަބަރު އަދިވެސް އެގޮތަށް އެބައޮތެވެ. ނަމަވެސް ކަން އޮތީ އެހެން ނޫންކަން ދިވެހިން ދެނެތިއްބެވެ.

ފަލަސްތީނުގެ ރައްޔިތުންނާ ދެކޮޅަށް ނަސްލުހޭދަ ހިންގުމަށް އެންމެ ވާގިވެރިވަނީ އެމެރިކާކަމަށްވާއިރު މިހާރު މި ސަރުކާރުން ވަނީ އެމެރިކާ އެކު ގާތް ގުޅުމެއް ބާއްވަން ފަށާފައެވެ. ރާއްޖޭގެ ތަރައްގީގައި އެމެރިކާއަކީ މުހިއްމު ގައުމެއް ކަމަށް ބުނެއެވެ.

މިފަހުގެ ތާރީހެއްގައި އެމެރިކާ ސަރުކާރާ އެންމެ ބަދަހި ގުޅުމެއް ބާއްވަމުން ދަނީ ރައީސް މުއިއްޒުގެ ސަރުކާރުންނެވެ. އެމެރިކާގެ ޕްރެޒެންސް ރާއްޖޭގައި މިދިޔަ 10 މަހުގެ ތެރޭގައި ވަރަށް ބޮޑުތަނުން އިތުރުވެފައިވާއިރު، ރާއްޖޭގައި ފައި ވިއްދަން އެމެރިކާއިން ކުރަމުންދާ ހުރިހާ ކަމަކަށް މި ސަރުކާރުން ދަނީ ވާގިވެރިވަމުންނެވެ.

މި ކަމުންވެސް ރައީސް މުއިއްޒުގެ ބަހާއި އަމަލުން ވެސް ފެންނަނީ ހަމަ ނިފާގުކަމެވެ. ވެރިކަމަށް އައުމާއި ދެމެހެއްޓުމުގައި ވެސް އިސްކުރައްވަމުން އެ ގެންދަނީ ނިފާގުކަމެވެ.

ފަލަސްތީނަށް ނަސްރު ލިބެން އެދޭ ކަމަށާ ފަލަސްތީނުގެ ހައްގުގައި ހަނގުރާމައަށް ނުކުންނަން ވެސް ތައްޔާރަށް ތިބި ކަމަށް ބުނެ އދގެ އާންމު މަޖިލީހުގައި ތަގްރީރުކުރެއްވި ނަމަވެސް ރައީސް މުއިއްޒުގެ އަމަލުފުޅޫން ފެންނަނީ އެޔާ ދިމާ އިދިކީލަ ކަންކަމެވެ.

ފަލަސްތީނުގެ ހައްގުގައި ކަމަށް ވިދާޅުވެ ތަގްރީރުކުރެއްވިއިރު "ފްރީ ފަލަސްތީނު" ސޭޝް އެއް ނުވަތަ ކުފްޔާއެއް ކީއްކުރަން ފަލަސްތީނުގެ ރަމްޒުކޮށްދޭ ބެޖެއް ހާ މިންވަރުވެސް ކޯޓުގައި ވެސް ޖަހާލަން ރައީސް މުއިއްޒަށް ނުކެރުނެވެ.

ފަަލަސްތީނު ރައްޔިތުންނާ އެކު ދިވެހި ސަރުކާރުން ދެމި އޮތް ކަމަށް ބުނުމަކީ ހަމައެކަނި ބުނެލާ ބުނެލުމެއްކަން ދަނީ މިފަދަ ކަންކަމުން ހާމަކަން ބޮޑުކޮށް ފެންނަމުންނެވެ.

ސަަހްޔޫނީންގެ ޕާސްޕޯޓު މަނާކޮށް އެވެރިންނަށް ރާއްޖެ އެތެރެވުން މަނާކުރަން ރައީސް މުއިއްޒަށް ކެރިވަޑައި ނުގަންނަވާނެއެވެ. ފަލަސްތީނުގެ ނަމުގައި ރައީސް މުއިއްޒާ މުޅި ސަރުކާރުވެސް ޖަހަމުންދަނީ ސިޔާސީ މޮޅު، ކުލަ ގަދަ މެޑަލެކެވެ. އަމަލުން އެކަން ދެއްކުމަކީ ކުރާނެ ކަމެއް ނޫންނެވެ.