ގުޑް ގަވަނާރސް ޕްރެކްޓިސް ކުރާނަމަ ސަރުކާރުގެ ތެރެއިން ބޭންކް އޮފް މޯލްޑިވްސް (ބީއެމްއެލް) ސިޔާސީ ކޮށްގެން ނުވާނެ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ބުރާސްފަތު ދުވަހުގެރޭ ޕީއެންއެފް އޮފީހުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ސަރުކާރުގެ ހަރަދުތައް ހަމަޖައްސަން ބޭންކް އޮފް މޯލްޑިވްސް (ބީއެމްއެލް) އިން ބޮޑެތި އަދަދުތަކުން ތަކުރާރުކޮށް ފައިސާ ދޫކުރަމުން ގެންދާތީ އެކަމާ ގުޅިގެން ކަންބޮޑުވުން ފާޅުކުރައްވާ ރައީސް ޔާމީން ވިދާޅުވީ ބީއެމްއެލް ސިޔާސީ ކުރުމަކީ ކޮށްގެން ވާނެ ކަމެއް ނޫން ކަމަށާ އެއީ ގާނޫނުން ވެސް ކުރެވެން އޮތް ކަމެއް ނޫން ކަމަށެވެ.

ރައީސް ޔާމީން އިތުރަށް ވިދާޅުވީ މިއަދު ރައީސުލްޖުމްހޫރިއްޔާ ނިސްބަތްވެވަޑައިގަންނަވާ ޕާޓީގެ މެޖޯރިޓީ މަޖިލިސް ތެރޭގައި އޮތުމުން އެކަން އެގޮތަށް ކުރެއްވިޔަސް އެއީ އަކީ ރަގަޅު ކަމެއް ނޫން ކަމަށެވެ.

ރައީސް ޔާމީން ވިދާޅުވީ މިކަންކަން އެންމެ ކައިރިން ބަލަން ޖެހޭޏީ ބޭންކުގެ ބޯޑުން ކަމަށެވެ. އެގޮތުން ބޭންކް އޮފް މޯލްޑިވްސްގެ ބޯޑުން މަސައްކަތްކުރަން ޖެހޭނީ ބޭންކަކީ "އެކްސެސިވްލީ" ރިސްކަށް ހުޅުވައިލެވޭ ތަނަކަށް ނުހަދަން ކަމަށާ އެ ބޭންކަކީ ވެންޗާ ލޯނު ދޭ ތަނެއް ނޫން ކަމަށެވެ. ބީއެމްއެލް އަކީ އެހާ ވަރަށް ރިސްކަށް ހުށަހެޅިގެންވާނެ ތަނެއް ނޫން ކަމަށް ވެސް އެމަނިކުފާނު ވިދާޅުވިއެވެ.

ބީއެމްއެލް އިން ސަރުކާރަށް މިފަހުން ދޫކުރި ގާތްގަނޑަކަށް ބިލިޔަނެއްހާ ރުފިޔާ ދޫކުރީ އެ ބޭންކްގެ ރިސްކް އެސެސްމެންޓް ޑިޕާޓްމަންޓުން އެކަން އެގޮތަށް ނުކުރަން ލަފާދީފައި ވަނިކޮށްކަން ރައީސް ޔާމީން ފާހަގަކުރެއްވިއެވެ. އަދި ބީއެމްއެލްގެ ބޯޑުގެ މެންބަރުކަން ވެސް ކުރިން ކުރައްވާފައިވާ ބޭފުޅެއްގެ ހައިސިއްޔަތުން ރައީސް ޔާމީނު ވިދާޅުވީ ބޭންކްގެ ރިސްކް އެސެސްމެންޓް ޑިޕާޓްމަންޓުން ވަކި ގޮތަކަށް ކަމެއް ނުކުރަން ބުނެފި ނަމަ އެކަމެއް ކޮށްގެން ނުވާނެ ކަމަށެވެ.

މީގެ އިތުރުން ބޭންކުން އެއް "ކްލަޔަންޓެއް"ގެ ގޮތުގައި ސަރުކާރަށް އެހާ ގިނަ ފައިސާ ދަރަންޏަށް ދޫކުރުމުގައި އޮތް އެންމެ ބޮޑު ރިސްކަކީ ސަރުކާރުން އެފައިސާ އަނބުރާ ނުދައްކައިފި ހާލަތެއްގައި އެ ފައިސާ ހޯދަން ކުރެވޭނެ ކަމެއް ނެތުމެވެ.

އެމަނިކުފާނު ވިދާޅުވީ ސަރުކާރަށް ދޫކުރި ފައިސާ ނުހޯދި ހޭދަވާ ކޮންމެ ދުވަހަކީ ރައްޔިތުންނަށް ލޯނު ދޫކޮށްގެން ބީއެމްލްއަށް އިތުރު ފައިސާ ހޯދަން ހުރަސް އެޅޭ ދުވަހެއް ކަމަށެވެ.

ރައީސް ޔާމީން މިފަދައިން ވިދާޅުވެފައިވާއިރު ދާދި ފަހުންވެސް ސަރުކާރުން ވަނީ 600 މިލިއަން ރުފިޔާގެ ލޯނެއް މުވައްޒަފުންގެ މުސާރަ ދިނުމަށް ބީއެމްއެލްއިން ނަގާފައިކަމަށް މީޑިޔާތަކުގައި ރިޕޯޓުކޮށްފައިވެއެވެ.