ފިޝަރީޒު މިނިސްޓްރީގެ ޓީމުން ގއ ދެއްވަދޫއަށް ކުރުމަށް ހަމަޖެހިފައި އޮތް ދަތުރު ކެންސަލުކުރި ކަމަށް އެ ރަށު ކައުންސިލު އެންގުމަށް ފަހު އޮޅުވާލައިގެން ރަށަށް އެރުމަށް މަސައްކަތްކުރުމުން ވެސް ރަށުގެ މަސްވެރިން ނުކުމެ އެމީހުން ފަހާ ފޮނުވާލައިފިއެވެ.
ފޭސްބުކްގައި އާންމުވެފައިވާ ވީޑިއޯއަކުން ފެންނަ ގޮތުގައި ފިޝަރީޒުގެ ޓީމު ދަތުރުކުރި ލޯންޗު އެރަށު ތޮއްޓަށް ގާތްކުރި ވަގުތު ގިނަ މަސްވެރިންތަކެއް ސަރަހައްދަށް އެއްވެ ލޯންޗުން އެމީހުންނަށް ފައިބަން ފުރުސަތު ނުދީ ވަނީ ހުރަސް އަޅާފައެވެ. އަދި އެކަމާ ރުޅި ގަދަވެ ފިޝަރީޒު ޓީމުގެ ބޭފުޅަކު މަސްވެރިންނާ ޖަދަލުކުރާ މަންޒަރުވެސް ފެނިގެން ދެއެވެ.
ފިޝަރީޒްގެ ވަފުދު ކުރިން އެރަށަށް ދާން އޮތީ ހުކުރު ދުވަހުގެ މެންދުރުފަހު 3:00 ގައެވެ. ނަމަވެސް ދެއްވަދޫއަށް ދާން އޮތް ދަތުރު ކެންސަލް ކުރިކަން ކައުންސިލަށް އެންގުމަށް ފަހު ފިޝަރީޒުގެ ޓީމުން ވަނީ މިއަދު އެރަށަށް އަރަން މަސައްކަތްކޮށްފައެވެ. އެރަށުގެ މަސްވެރިން ބުނެފައިވަނީ މަސްވެރިން ބިކަކޮށް މަގުމަތިކޮށް ޗަކޮއެ ހިތުހުރިހާ އެއްޗެއް ހެދޭނެ ކަމަށް ހީނުކުރުމަށެވެ.
މަސް ދޯނި ފަހަރުގައި ލޮނު ފެނުން މަސް ފިނިކުރާ ނިޒާމު ގާއިމު ކުރުމުގެ މަޝްރޫއާ ބެހޭ މައުލޫމާތު ދިނުމަށް ފިޝަރީޒް މިނިސްޓަރީގެ ޑެޕިއުޓީ މިނިސްޓަރުން ހިމެނޭ ވަފުދަކުން މިހާރު ދަނީ ދެކުނުގެ ބައެއް ރަށްރަށަށް ދަތުރެއް ކުރަމުންނެވެ. އެ ދަތުރުގެ ތެރެއިން ބުރާސްފަތި ދުވަހު އެ ވަފުދު ދިޔައީ ގއ. ދާންދޫ އަށެވެ.
ނަމަވެސް އެ ރަށު މަސްވެރިން ވަނީ ސަރުކާރުން މަސްވެރިންނަށް ދޭންޖެހޭ ފައިސާ ނުދީ އެ ރަށަށް ނޭރޭނެ ކަމަށް ބުނެ އެ ވަފުދު އެ ރަށުން ފޮނުވާލާފައެވެ. ފިޝަރީޒްގެ ވަފުދު ދެއްވަދޫއަށް ދާން އޮތްކަން އެނގުމާއެކު، އެ ރަށު ބަނދަރު މަތީގައި ވުސް ބެނާތައް ދަމައި މަސްވެރިންނާއި އޮޑިވެރިން ތިބީ މުޒާހަރާއަށް ތައްޔާރުވެގެންކަން ވަނީ ހާމަވެފައެވެ.
މި ސަރުކާރުން ވެރިކަމަށް އައީ މަސްކިރާތާ 48 ގަޑިއިރު ތެރޭ މަސްވެރިންނަށް ފައިސާ ދޭނެ ކަމުގެ ވައުދާއެކުގައެވެ.ނަމަވެސް މަސްވެރިންނަށް ފައިސާ ދިނުމުގައި އިހުމާލުވަމުންދާތީ މަސްވެރިން އަންނަނީ ސަރުކާރާ ދެކޮޅަށް މުޒާހަރާ ކުރަމުންނެވެ.
