ދުނިޔޭގެ ހިތުގެ ދުވާހާ ގުޅޭ ގޮތުން، ޕީޕަލްސް ނެޝަނަލް ފްރޮންޓު (ޕީއެންއެފް) އިން އިންތިޒާމުކޮށްގެން ޚާއްސަ ޕެނަލް ޑިސްކަޝަނެއް ބާއްވަން ނިންމައިފިއެވެ.

މިކަމާ ގުޅިގެން ތޭރަ އޮންލައިނަށް މައުލޫމާތު ދެއްވަމުން ޕީއެންއެފްގެ ރެޖިސްޓްރާ އަލީ ޝިއާން ވިދާޅުވީ، މި ޕެނަލް ޑިސްކަޝަންއަކީ އެ ޕާޓީގެ އިޖްތިމާއީ ކޮމިޓީއިން އިސްނަގައިގެން ބާއްވާ ޕެނަލް ޑިސްކަޝަނެއް ކަމަށެވެ.

ޕެނަލް ޑިސްކަޝަންގެ މައުޟޫއަކީ "ހިތުގެ ދުޅަހެޔޮ ކަން" އެވެ. ޝިއާން ވިދާޅުވި ގޮތުގައި ޕެނަލްގައި ތިއްބަވާނީ ޑރ. އިޝާނީ ކަރިޔަވަސް، ޕިޒިކަލް ޓްރެއިނީ މުހައްމަދު އިމްދާދު އަދި ޑރ. ނަސްރުﷲ މުސްތަފާއެވެ.

މި ޕެނަލްގައި އާންމުންނަށް ބައިވެރިވެ ސުވާލުކުރުމުގެ ފުރުސަތު އޮންނާނެ ކަމަށް ޕިއެންއެފުން ހާމަކޮށްފައިވެއެވެ. ޕެނަލް ޑިސްކަޝަން އޮންނާނީ ޕީއެންއެފް އޮފީހުގައި މިރޭ 8:45 ގައެވެ. މި އިވެންޓު ޗެނަލް13 އިން ލައިވް ކުރާނެއެވެ.

ރާއްޖޭގައި އެންމެ ފުރަތަމަ ހިތުގެ ދުވަހެއް ފާހަގަކުރީ 2010 ވަނަ އަހަރުގައެވެ.

ދުޅަ ހެޔޮ ހިތެއްގެ ވެރިއެއްގެ ގޮތުގައި ދެމިހުރުމަށް، ތެލާއި ލޮނު މަދުން ބޭނުން ކުރުމާއި ތަރުކާރީ އާއި މޭވާ ގިނައިން ބޭނުން ކުރުން މުހިއްމު އިރު މަސައްކަތު މާހައުލުގައި މާ ބޮޑަށް ހާސްވެ ނުތަނަވަސްވާ ކަހަލަ ކަންތައްތަކާ ދުރުހެލިވެވޭތޯ ބެލުން ރަނގަޅެވެ. އަދި އޮފީހަށް ދިޔުމާއި އައުމުގައި ނުވަތަ ލަންޗް ބްރޭކްގައި ހިނގާފައި އުޅުމަށާއި ބައެއް ގަޑިތަކުގައި ލިފްޓުގެ ބަދަލުގައި ސިޑި ބޭނުން ކުރުމުގެ އިތުރުން މަސައްކަތު މާހައުލުގައި ދުންފަތުގެ އިސްތިއުމާލު ނުކުރުމަށް ބާރު އެޅުމަކީ ވެސް މުހިއްމު ކަމެއް ކަން ފާހަގަކުރެވެއެވެ.

ހިތުގެ މައްސަލައެއް ހުރި ނަމަ، ހިނގަން ފެށުމުން ނޭވާ ކުރުވުމާއި މޭ ދަށަށް ތަދުވުން ފަދަ ކަންކަން މެދުވެރިވާނެ ކަމަށް ޑޮކްޓަރުން ވިދާޅުވެއެވެ. އެފަދަ ތަދެއް އަރާފައި ފަސް މިނެޓަށް ވުރެ ގިނަ އިރު ވެއްޖިއްޔާ ހޮސްޕިޓަލަށް ދިއުމަށް ޑޮކްޓަރުން ނަސޭހަތް ދެއްވައެވެ. ހިތުގެ ވިންދު އަވަސްވުން ނުވަތަ ލަސްވުމަކީ ވެސް މައްސަލައެކެވެ. އަދި ފައި ދުޅަވުމާއި ނިދާފައި އޮއްވާ ނޭވާ ހާސްވެގެން ހޭލެވުމާއި މިކަންކަމަކީ ހާޓް އެޓޭކެއް ޖެހުމުގެ ސިގްނަލްތައް ކަން ޑޮކްޓަރުން ފާހަގަކުރައްވައެވެ.

ގިނަ ދިވެހިން ހިތަށް ފަރުވާތެރި ވަނީ ބައްޔެއް ޖެހުމަށް ފަހުގައި ކަން ފާހަގަކުރެވެ އެވެ. ޑޮކްޓަރުން ވިދާޅުވަނީ ހިތުގެ ބައްޔެއް ނެތަސް، ހާއްސަކޮށް އުމުރުން 45 އަހަރުން މައްޗަށް ދިއުމުން ނުވަތަ އާއިލާގައި ހިތުގެ ބައްޔެއް ޖެހިފައިވާ މީހަކު ހުރިހަމަ ހިތުގެ ޗެކަޕް ހެދުން ރަނގަޅު ކަމަށެވެ. އަދި ހިތުގެ ބައްޔެއް ޖެހިދާނެ ކަމަށް މަގުފަހިވެދާނެ ކަންކަން، މިސާލަކަށް ކޮލެސްޓްރޯލް، ހަކުރު އަދި ޕްރެޝަރު ބެލުން މުހިންމު ކަން ވެސް ޑޮކްޓަރުން ފާހަގަ ކުރައްވައެވެ.