ރައީސް އަބްދުﷲ ޔާމީންގެ ދައުރުގައި އެމަނިކުފާނު ގައުމަށް ހަލުވި ދުވެލީގައި ގެނެސްދެއްވި ތަރައްގީއާ ތަމައްދުނު ފެނި ރައްޔިތުން އެމަނިކުފާނުގެ އެ ބާރު މިނަށް "ޔާނު ސްޕީޑޭ" ކިޔެވެ. ބައެއް މީހުން "ރޮކެޓު ސްޕީޑޭ" ވެސް ކިޔެއެވެ. ޝައްކެއް ނެތް ގޮތުގައި އޭގެ ފަހަތުގައި އޮތީ އެމަނިކުފާނު ގައުމަށް ގެނެސްދެއްވި ހަލުވި ހައްލުތަކާ މައްސަލަތަކަށް ދެއްވި ހާޒިރު އަވަސް ޖަވާބެެވެ.

އެހެންކަމުން އެމަނިކުފާނުގެ ތާއީދާއެކު އިންތިހާބަށް ނުކުމެވަޑައިގެންނެވި ކެންޑިޑޭޓޭއްގެ ވެރިކަމުގައި ވެސް ރައްޔިތުން އުއްމީދު ކުރާނީ އެ ފަދަ ހަލުވި ތާޒާ ތަރައްގީއާ ތަމއްދުންއަށެވެ. ގައުމުގެ މުސްތަގުބަލު އަލިވެ އުޖާލާވުމަށެވެ.

ނަމަވެސް ވެރިކަމަށް 10 މަސް ވެގެން ދިޔައިރު ގައުމުގެ ރައްޔިތުންގެ ހާލަތު ހުރީ ކިހިނަކުންބާއެވެ؟ މިއީ މިއަދު ކުރުމަށް ވުރެ ނުކުރުން ރަގަޅު ސުވާލަކަށްވެސް ވެދާނެއެވެ. އެހެނީ ކޮންމެ ރައްޔިތަކު ގާތުން ކިހިނެއްތޯ ސުވާލުކޮށްފި ނަމަ ފެންނާނީ ކަރު އެލުވާލާ މަންޒަރު ކަމަށްވުމުންނެވެ. އެއާއެކު ބޯ ހޫރާލާ ލޮލުން ކަރުނަ ފާއްދާލާ މަންޒަރެވެ. އެއީ އެ ރައްޔިތުންގެ ދިރިއުޅުމުގެ ހާލަތު އިންތިހާއަށް ދަށްވެ ރައްޔިތުން ބިކަ ވަމުންދާތީއެވެ.

ޖަޒީޖާ ރާއްޖޭގައި އަތް ނުފޯރާ ފަށަށް މުދަލާ ޚިދުމަތުގެ އަގު ބޮޑުވެ ރައްޔިތުންނަށް ތަކްލީފުތަކާ ކުރިމަތިލާން ޖެހުމުން އެކަން ކަން ނިމުމަކަށް ގެންނަން ގެނައި ވެރިކަމުގައި ވެސް އަދި މާކުރީ ކޮޅު މިހާލު ޖެހުމުން ދެރަނުވާނީ ކާކުތޯއެވެ.

ނުހަނު ފޮނު އުއްމީދާއެކު ގެނައި ސަރުކާރުގައި ރައްޔިތުން މިއަދު ބިކަވެ ހާލުގައި ޖެހިއްޖެއޭ ބުނުމަކީ ދޮގަކަށް ނުވާނެކަން ޔަގީނެވެ. އެ ރައްޔިތުންގެ އަނގަޔާ އަތާ ދިމާނުވެއެވެ. އެ ރައްޔިތުންގެ އުއްމީދުތައ ްފުނޑު ފުނޑުވެއްޖެއެވެ. ބޭރުގައި ކިޔަވަން ތިބި ދަރިންނަސް ޑޮލަރު ފޮނުވޭނެ ގޮތެއް ނެތި އެކުދިންގެ ކިޔެވުމަށް ހުރަސްއެޅިއްޖެއެވެ.

ޑޮލަރުގެ އަގު އިންތިހާއަށް އުފުލިފައިވާއިރު މުދަލާ ޚިދުމަތުގެ އަގު ހުރީ ރުކު ކުރީއެވެ. ރައްޔިތުންނަށް ހަދާނެ ގޮތް ހުސްވެ ދިރިއުޅުމުގައި ހަތަރު އަނގޮޅި ކަންމައްޗަކަށް ހުއްޓެން މަޖްބޫރުވެއްޖެއެވެ. ގަރުދިޔަ އާ ބަތާވެސް ކާނެ ހާ މިންވަރު ގިނަ ރައްޔިތުންގެ ނެތެވެ. އެހެެނީ މަސްވެސް އަގު ބޮޑުކަމުންނެވެ. ތުރުކީއިން ގެންނަން ބުނި ހަނޑުލުގެ ޚަބަރެއް ނުވެ އަގު ބޮޑުކޮށް ގަންނަ ހަނޑޫވެސް އިގްތިސޯދުކޮށްގެން ގޭގައި ބޭނުންކުރަން ޖެހުމުންނެވެ.

ކަލު ސައިތައްޓަކުންވެސް ފުއްދާލެވެން ނެތެވެ. އެއަށް ރަހަ ަލއްވަން އަޅަން ޖެހޭ ހަކުރުގެ ވެސް އަގު ބޮޑީއެވެ. އަނެއްކާ ސައިފަތްވެސް ހަމަ އެހާމެ އަގު ބޮޑެވެ.

ކަރަންޓާ ފެނުގެ އަގު އަތް ނުފޯރާފަށުގައެވެ. މިހެން ގޮސް ކިޔާފައި ނުކިޔާނެ ވާހަކައެއް މިއަދު އުޑޫހިޔާ ދަށުގައި ނެތެވެ. ނަމަވެސް އެއްވެސް ދިމާއަކުން މުސާރަތައް ބޮޑުކުރާ މަންޒަރެއް ނުފެނެއެވެ

ޖީބު ބޮޑުވަނީ ހަމައެކަނި ސިޔާސީ ވެރިންގެއެވެ. މުއިއްޒު ސްޕީޑުގައި ކުރިއަށް ދިޔައި ގައުމުގެ އިގްތިސޯދެއްވެސް ނޫނެވެ. މުއިއްޒު ސްޕީޑުގައި ރާއްޖެއަށް އައި ތަަރއްގީއެއް އަދި ފެނުން މައްޗަށް ތޮޅި ނުލައެވެ. މުއިއްޒު ސްޕީޑުގައި ނިމިދިޔަ ދިހަ މަސް ތެރޭގައި ފެނިގެން ދިޔައީ ޚިދުމަތާ ތަކެތީގެ އަގު ބޮޑުތަނުން ބޮޑުވެ ރައްޔިތުން ފަނާވާ ތަނެވެ. އެހެންކަމުން މިކަހަލަ ސްޕީޑެއް ދިވެހިން ބޭނުންނުވާނެކަން ޔަގީނެވެ.