ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ފަރާތުން ރައްޔިތުންގެ މަޖިލީހުގެ ޕީއެންސީ މެމްބަރުންނަށް މި މަހުވެސް ބައި ލައްކަ ރުފިޔާ ދިންކަން ހާމަވެއްޖެއެވެ.

"ތޭރަ އޮންލައިން"އަށް މައުލޫމާތު ލިބުނުގޮތުގައި މިފަހަރު މިކަން ކޮށްފައި ވަނީ ވަރަށް ސިއްރުންނެވެ. އެގޮތުން އެންމެ ފަހުން ފައިސާ ބެހި މަންޒަރު "އަދަދު" ނޫހުން ވީޑިޔޯކޮށް ޑޮކިޔުމެންޓަރީއެއް ހެދުމުން އެ ނޫހަށް ގާނޫނީ ފިޔަވަޅު އަޅަން ވެސް ރައީސް އޮފީހުން ވަނީ ނިންމާފައެވެ.

ރައީސް މުއިއްޒުގެ ފަރާތުން ޕީއެންސީ ހުރިހާ މެމްބަރުންނަށް ފައިސާނުދެއެވެ. 50،000 ރުފިޔާ ހައްގުވަނީ ސަރުކާރު ޕްރޮމޯޓްކުރުމުގައި ގަދަޔަށް މަސައްކަތްކުރާ މެމްބަރުންނަށް އެކަނިންކަން ފާހަގަކޮށްލެވެއެވެ. އެގޮތުން ނަން ހާމަނުކުރުމަށް ޝަރުތުކޮށް މި ނޫހަށް މައުލޫމާތު ދިން މެމްބަރަކު ވެސް ވިދާޅުވީ ބައި ލައްކަ ރުފިޔާ ދެނީ ސަރުކާރަށް ސަނާ ކިޔައި ސަރުކާރުން ކުރާ ނޭދެވޭކަންކަން ފޮރުވާ މެމްބަރުންނަށް އެކަނިންކަމަށެވެ.

"ތޭރަ އޮންލައިން" އަށް މައުލޫމާތު ދިން ޕީއެންސީގެ މަޖިލިސް މެމްބަރަކު ބުނީ ހަގީގަތުގައި ރައީސް މުއިއްޒު ވައުދުވެޑައިގަތީ އެއް ލައްކަ ރުފިޔާ ދިނުމަށް ކަމަށެވެ. ނަމަވެސް މި ހަތަރު މަހު ވެސް އަދި ދިނީ ބައި ލައްކަ ރުފިޔާއެވެ.މިދިޔަ ދެ މަހު ހުރިހާ މެމްބަރުންނަށް ވެސް ބައި ލައްކަ ދިން ނަމަވެސް މި މަހު ބައެއް މެމްބަރުންނަށް އެ ފައިސާ ދީފައިނުވެއެވެ.

މައުލޫމާތު ދެމުން އެ މެމްބަރު ވިދާޅުވީ ބައި ލައްކަ ނުދީ ބާކީ ކޮށްފައި ވަނީ އެއްވެސް ވަރަކަށް ސަރުކާރަށް ސަނާ ކިޔުމަށް ޓީވީ ޕްރޮގްރާމްތަކަށް އަރާފައި ނުވާ މެމްބަރުންނެވެ.މިކަން މިހެން ހިނގުމުން ބައެއް މެމްބަރުން ވަނީ ރައީސް މުއިއްޒު ވައުދާ ހިލާފްވެއްޖެ ކަމަށް ބުނެ ނުރުހުން ފާޅުކޮށްފައެވެ.

މެމްބަރުންނަށް ބައި ލައްކަ ދެމުންދާ ވާހަކަ ހުދު މެމްބަރުން ބުނަމުން އަންނަ އިރު ވެސް ސަރުކާރުން އަންނަނި ތަކުރާރުކޮށް މިކަން ދޮގު ކުރަމުންނެވެ.