ސިޔާސީ ބޭނުމެއްގައި ރައްޔިތުންގެ ބެންކް، ބެންކް އޮފް މޯލްޑިވްސް އިން ބަގާވާތް ކުރިކަމަށް ބުނެ ރައީސް ޑރ މުހައްމަދު މުއިއްޒު ވާހަކަތަކެެއް ދެެއްކެވުމުން ރައީސް ޔާމީން އަބްދުލްގައްޔޫމް ފާޑުވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައި ވަނީ ބުރާސްފަތި ދުވަހު ޕީއެންއެފް އިން ބޭއްވި ޖަލްސާގައި ވާހަކަދައްކަވަމުންނެވެ.

އެގޮތުން އެމަނިކުފާނު ވިދާޅުވީ ރާއްޖޭގެ މައި ބޭންކް ކަމަށްވާ ބޭންކް އޮފް މޯލްޑިވްސް އަށް ބަޣާވާތް ކުރި ކަމަށް ގައުމުގެ ރައީސް ވިދާޅުވެ ނާޒުކު ހާލަތަކަށް ގައުމު ވައްޓާލާފައިވާ ކަަމަށެވެ.

މީގެ އިތުރުން، މި ފަހުން ސަރުކާރުގެ ބޭނުމަށް ބީއެމްއެލް އިން 2 ބިލިއަން ރުފިޔާ ނަގާފައިވާ ކަމަށާއި ސަރުކާރުން ގައުމު ހިންގުމުގެ އެއްވެސް ގާބިލުކަމެއް ނެތް ކަމަށް ޖަލްސާގައި ފާހަގަކުރުމުން ރައީސް ވަނީ ސަރުކާރުގެ މުވައްޒަފުންނަށް މުސާރަ ދިނުމަށް ބޭންކުން ލޯނު ނެގުން އެއީ ކޮށްގެންވާނެ ކަމެއް ނޫން ކަމަށް ވިދާޅުވެފައެވެ.

އޭގެއިތުރުން ރައީސް ޔާމީން ވިދާޅުވީ މިފަދައިން ކަންތައް ކުރުމުން ބޭންކް މެދުވެރިކޮށް ލޯނު ނަގާ ރައްޔިތުންނާއި ވިޔަފާރިވެރިންނަށް ލޯނު ދިނުމަށް ބޭންކަށް ހުރަސްތަކެއް ދިމާވާނެ ކަމަށެވެ.

ބީއެމްއެލް އަކީ ރައްޔިތުންގެ 32 ޕަސެންޓް ތަނެއްކަމަށާއި އެއީ ސަރުކާރުން ބޭނުން އިރަކު ބޭނުން ކަމެއް ކުރުމަށް ހުރި ތަނެއް ނޫން ކަމަށް ރައީސް ޔާމީން ވަނީ ވިދާޅުވެފައެވެ.

ބޭންކު ސިޔާސީ އެތައް ބޭނުމެއް ފުއްދުމަށްޓަކައި ބޭނުން ކުރަމުން އަންނާތީ ރައީސް ޔާމީން ވަނީ ސަރުކާރަށް ފާޑުވިދާޅުވެފައެވެ.