ރައީސް އަބްދުﷲ ޔާމީންގެ މައްސަލަ ބައްލަވާ ގާޒީގެ ސުލޫކީ މައްސަލައެއް އުފަންކޮށް ބަލަން ފަށައިފިއެވެ.

މިކަން ހާމަކޮށްފައިވަނީ ގާނޫނީ ވަކީލު އާދަމް އާސިފް އެކްސްގައި ކުރެއްވި ޕޯސްޓެއްގައެވެ.

އުސްތާޛު އާސިފުގެ ޕޯސްޓުގައި ވިދާޅުވެފައިވަނީ ރައީސް ޔާމީންގެ މައްސަލަ ކުރިމިނަލް ކޯޓުގައި މިހާރު ބައްލަަވަމުން ގެންދަވާ ގާޒީ އަލީ ނަދީމުގެ ސުލޫކީ މައްސަލައެއް ފެންމަތިކޮށް ބަލަން ފަށައިފި ކަމަށެވެ.

ސަރުކާރުގެ ކޮންޓްރޯލު އޮތް ޖުޑީޝަލް ސާވިސް ކޮމިޝަނުން މިފަދަ މައްސަލައެއް ބަލަން ފަށާފައިވާކަން އާސިފް ކަށަވަރުކޮށްދެއްވާފައިވަނީ އިތުބާރު ހުރި މަސްދަރަކާ ހަވާލާދެއްވާއެވެ.

މިކަމާ ގުޅިގެން މައުލޫމާޓު ހޯދާލަން ތޭރަ އޮންލައިންއިން ކުރި މަސައްކަތުން އެނގިފައިވާ ގޮތުގައި މައްސަލަ އުފަންކޯށް ބަޔާން ނަގަން އެއް ފަހަރު އެޖެންޑަވެސް ކޮށްފައިވެއެވެ. މިކަމާ ގުޅިގެން ގާޒީ ނަދީމުގެ ބަހެއް ހޯދާލަން ކުރި މަސައްކަތް ވަނީ ކާމިޔާބު ވާގޮތް ނުވެފައެވެ.

ރައީސް ޔާމީންގެ މައްސަލަ ބައްލަވާ ގާޒީގެ ސުލޫކީ މައްސަލައެއް ފެންމަތިކޮށް ބަލަން ފަށާފައިވާކަން ހާމަވެފައިވާއިރު، ރައީސް ޔާމީންގެ މައްޗަށް ނިމިދިޔަ ސަރުކާރުގައި އެންމެ ފުރތަމަ އުފަންކުރި މައްސަލަ ބެއްލެވި ގާޒީވެސް ހުކުމާ ހަމައަށް ގޮސްފައިވަނިކޮށް ސުލޫކީ މައްސަލައެއް ފެންމަތިކޮށް ގާޒީ އަހުމަދު ހައިލަމްގެ މައްސަލައެއް ބަލަން ފެށިއެވެ.

އޭރު އިދިކޮޅުގައި ތިބެ ޕީޕީއެމް/ޕީއެންސީއިން ތުހުމަތުކުރި ގޮތުގައި އެއީ ރައީސް ޔާމީންގެ މައްޗަށް ގއ. ވޮޑެމުލާ މައްސަލަައިގައި ރައީސް އޮފީހުންނާ ސަރުކާރުން ބޭނުންވާ ގޮތަށް ހުކުމް ޖަހައިދިނުމަށް ހައިލަމް ދެކޮޅު ހެދުމުންނެވެ.

އެހެންކަމުން ވ. އާރަށުގެ މައްސަލައިގައި ރައީސް ޔާމީންގެ މައްސަލަ މިހާރު ބައްލަވާ ގާޒީ އަލީ ނަދީމުގެ މައްޗަށް ސުލޫކީ މައްސަލައެއް އުފަންކޮށްގެން އުޅެނީ ސަރުކާރަށް ފަނޑިޔާރު ކޮންޓްރޯލުނުކުރެވުމުން ކަމަށް ބެލުމުގެ ފުރުސަތު އެބައޮތެވެ.

ވ. އާރަށުގެ މައްސަލަ ދެވަނަ ފަހަރަށް ކުރިމިނަލް ކޯޓުން ބަލަން ފަށާފައިވަނީ ހައިކޯޓުން އެ މައްސަލަ ދަށު ކޯޓަށް ތަހްވީލުކުރުމުންނެވެ. އާރަށުގެ މައްސަލަ ކުރިން ބެއްލެވި ގާޒީ އަހުމަދު ޝަކީލަށްވެސް ނިމިދިޔަ ސަރުކާރުން ވަނީ ރައިސް ޔާމީންއާ ދެކޮޅަށް ހުކުމް ޖެހުމުން ހައިކޯޓުގެ ފަނޑިޔާރުކަން ދީފައެވެ. ފަހުން ޝަކީލު ވަނީ ބަލި ހާލަތު ހުރި ގޮތުންކަމަށް ބުނެ މަގާމުން ރިޓަޔަރ ކުރައްވާފައެވެ.

ރައީސް ޔާމީން މައްސަލަ ބައްލަވާ ގާޒީގެ ސުލޫކީ މައްސަލައެއް އުފަންކޮށް ކުރީ ސަރުކާރެކޭ އެއްފަދައިން މިސަރުކާރުން ވެސް އަމަލު މިކުރަނީ ރައީސް ޔާމީންގެ ޝަރީއަތަށް ނުފޫޒު ފޯރުވައި ރައީސް ޔާމީނަށް އަނިޔާވެރިވުމަށްކަމަށް ބެލުމުގެ ފުރުސަތު މިކަމުގެ ސަބަބުން ތަނަވަސްވެގެން ދެއެވެ. މިއީ ގާޒީއެއްގެ ސުލޫކީ މައްސަލައެއް ފެންމަތިކޮށް މިހާ އަވަސްއަރުވާލައިގެން ބަލަން ފެށި ފުރަތަމަ ފަހަރެވެ.