މާފުށީ ޖަލަށް މަސްތުވާތަކެއްޗާއި ފޯނު ވައްދާ ކަމަށް ތުހުމަތު ކުރެވިގެން ހައްޔަރު ކުރި ކަރެކްޝަނަލް ސާވިސްގެ 13 އޮފިސަރުންގެ ތެރެއިން ދައުވާކޮށްދޭން އެދި ޕްރޮސިކިއުޓާ ޖެނެރަލްގެ އޮފީހަށް ފޮނުވާފައިވާ އެކަކު ބަންދުން ދޫކޮށްލައިފި އެވެ.
މިނިވަންކޮށްފައިވަނީ ޖަލުގެ އާމަރީ ކުރިމަތިން ހައްޔަރުކުރި ކ. މާފުށީ މާވިނަ، ޒަޔާން އަހްމަދު އެވެ.
މާފުށީ ޖަލުގައި ފުލުހުންނާއި ސިފައިން ގުޅިގެން ހިންގި އޮޕަރޭޝަނެއްގައި މި އޮފިސަރުން ހައްޔަރުކުރީ މިދިޔަ ޖޫން މަހު އެވެ.
މި އޮޕަރޭޝަނަށްފަހު ފުލުހުން ބުނެފައިވާ ގޮތުގައި އެ ކުށް ކުރުމުގައި ޖަލު އޮފިސަރުންގެ 18 މީހަކު ބައިވެރިވި އެވެ. އެ މީހުންގެ އެކައުންޓްތަކަށް މިދިޔަ އަހަރެއްހާ ދުވަހުގެ ތެރޭގައި 73.6 މިލިއަން ރުފިޔާ ޖަމާވެފައިވާ ކަމަށްވެސް ބުންޏެވެ.
މާފުށީ ޖަލަށް ތަކެތި ވައްދާ ކަމުގެ ތުހުމަތުގައި އޮފިސަރުންތަކެއް ހައްޔަރުކޮށް، ދައުވާކުރަން ފޮނުވިއިރު ބޮޑެތި ސްކޭމްތައްކޮށް ފައިސާ ފޭރިގަންނަ މައްސަލަތަކުގައިވެސް މާފުށީ ޖަލުގެ ގައިދީންނާ އެކު ކަރެކްޝަނަލް ސާވިސްގެ ޖަލު އޮފިސަރުންގެ ބައިވެރިވުން އޮތްކަން ތަހުގީގަށް ފާހަގަކުރެވިފައިވާ ކަމަށް ފުލުހުން ވަނީ ބުނެފަ އެވެ.
