ސަހްޔޫނީން ލުބުނާނަށް ދެމުން އަންނަ ހަމަލާތަކުގައި ފާއިތުވި 24 ގަޑިއިރު އެގައުމުން 37 މީހުން މަރާލާފައިވާ ކަމަށް ލުބްނާންގެ ހެލްތް މިނިސްޓްރީން ބުނެފިއެވެ.

މި ހަމަލާތަކުގައި 131 މީހުން ޒަޚަމްވެފައިވާކަމަށްވެސް އެ އިދާރާއިން ހާމަކޮށްފައިވެއެވެ.

ސަހްޔޫނީން ލުބުނާނަށް އެންމެ ވަރުގަދަ ހަމަލާތަކެއް ދެމުން އަންނަނީ އެގައުމުގެ ވެރިރަށް، ބެއިރޫތުގެ ބައެއް ސަރަހައްދުތަކަށެވެ. އެގޮތުން ރޭ ވެސް ވަރުގަދަ ހަމަލާތަކެއް އެ ސަރަހައްދުތަކަށް ވަނީ ދީފައެވެ.

ސަހްޔޫނީން ލުބުނާނަށް ހަމަލާތައް ދެމުން އަންނައިރު، އެގައުމަށް އެންމެ ވާގިވެރިވާ، އެމެރިކާގެ ރައީސް، ޖޯ ބައިޑެން ވަނީ ސަހްޔޫނީން ލުބުނާނަށް ދޭ ހަމަލާތަކުގައި އާންމުންނަށާއި އާންމުން ދިރިއުޅޭ އިމާރާތްތަކުގެ އިތުރުން ތެޔޮ ކާރުހާނާތަކަށް ހަމަލާ ނުދިނުމަށް އިލްތިމާސްކޮށްފައެވެ.

އީރާން އާ ލުބުނާނުން ސަހްޔޫނީންނަށް ހަމަލާދޭން ފަށާފައިވަނީ ޣައްޒާއަށް މެދުކެނޑުމެއް ނެތި ސަހްޔޫނޫން ދެމުން ގެންދާ ނިރުބަވެރި ނަސްލު ހޭދައިގެ ހަމަލާތަކުގެ ރައްދު ގޮތުންނާ އަދި ހަމާސްގެ ލީޑަރު އިސްމާއިލް ހަނިއްޔާ އާއި ހިޒްބުﷲ ގެ ލީޑަރު ހަސަން ނަސްރުﷲ އަވަހާރަކޮށްލުމާ ގުޅިގެން ބަދަލު ހިފުމަށެވެ.

މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ނިރުބަވެރި ސަހްޔޫނީން ފަލަސްތީނުގެ އެކި ސަރަހައްދުތަކަށް ދެމުން އަންނަ ހަމަލާތަކުގެ ތެރެއިން ހުޅަނގުއައްސޭރީގައި ގަތުލުއާންމެއް ހިންގައި ގިނަ ބަޔަކު އއިްޔެ ވެސް ވަނީ ޝަހީދުކޮށްލާފައެވެ.

މިހަމަލާއާއި ގުޅިގެން ފަލަސްތީނުގެ ހެލްތް މިނިސްޓްރީން ބުނީ، ގިނަ ބަޔަކު ތިބި ސަރަހައްދަށް ދިން އެ ހަމަލާގައި މިހާތަނަށް 20 މީހުން ޝަހީދުކޮށްލާފައިވާ ކަމަށެވެ. މިހަމަލާގައި މިހާތަނަށް 20 މީހުން ޝަހީދުކޮށްފައިވީ ނަމަވެސް މި އަދަދު ވެސް އިތުރުވުމަކީ އެކަށީގެންވާ ކަމެއް ކަމަށް މިނިސްޓްރީން ވަނީ ބުނެފައެވެ.

ސަހްޔޫނީން ޣައްޒާގެ އެކި ސަރަހައްދުތަކަށް ދެމުން އަންނަ ހަމަލާތަކުގައި މިހާތަނަށް ޣައްޒާއިން 41،788 މީހުން ޝަހީދުކޮށްލާފައިވާއިރު، މީގެ ތެރެއިން 723 މީހުން ޝަހީދުކޮށްލާފައިވަނީ ހުޅަނގުއައްސޭރިންނެވެ.

މި ހަމަލާތަކުގައި 96،794 މީހުން ޒަހަމްކޮށްލާފައިވާއިރު، އޭގެ ތެރޭގައި ހުޅަނގު އައްސޭރީން ޒަހަމްކޮށްލާފައިވާ 5،750 މީހުން ހިމެނޭ ކަމަށް ހެލްތް މިނިސްޓްރީން ވަނީ ބުނެފައެވެ.