ރައީސުލްޖުމްހޫރިއްޔާ ޑރ މުހައްމަދު މުއިއްޒުހާ އަވަހަށް ކޮރަޕްޓް ވެރިއެއްގެ ލަގަބު ލިބުނު އެހެން ވެރިއެއް ނެތްކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެ އެވެ.
ޑރ ޖަމީލް މިފަދައިން ވިދާޅުވެފައި ވަނީ ބުރާސްފަތި ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަދައްކަވަމުންނެވެ.
އެގޮތުން ޑރ ޖަމީލް ވިދާޅުވީ ދިވެހިރާއްޖޭގެ މުޅި ތާރީހުގައި ވެސް ރައީސް މުއިއްޒު ހޯދި "ކައްޒާބްގެ" ލަގަބު އިތުރު އެހެން ވެރިއަކަށް ނުލިބޭކަމަށެވެ.
އޭގެއިތުރުން ރައީސް މުއިއްޒު ދޮގު ހަދަމުން ގެންދަވަނީ ވަކި ކަމެއްގައި ނޫންކަމަށް އިޝާރާތްކުރައްވާ ޑރ ޖަމީލް ވިދާޅުވީ ވެރިކަން ހޯދެއްވި އެންމެ ފުރަތަމަ ދުވަހު ވެސް ރައީސް މުއިއްޒު ކޮރަޕްޓްވެއްޖެ ކަމަށެވެ.
ވެރިކަން ބަދަލުވި ދުވަހު މީނަ ފަސާދަވެއްޖެ ދެއްތޯ. މީނަ ދޮގު ހަދައިދި، ކޮރަޕްޓް ވެއްޖެ، ވައްކަންކޮށްފި. ޕާޓީއާ، ރައްޔިތުންނާ، ރައްޔިތުން ދިން ވޯޓާ ހިފައިގެން ގޮސް މީނާ ކޮރަޕްޓްވެއްޖެ ނޫންތޯ
ޑރ ޖަމީލް ވިދާޅުވިއެވެ.
ޑރ ޖަމީލް އިތުރަށް ވިދާޅުވީ ވެރިކަން ހޯދީ ރައްޔިތުންނަށް އޮޅުވާލައިގެންކަމަށާއި ހުވާ ކުރެއްވި ދުވަހު ބޮޑު ރަސްމިއްޔާތެއް ބާއްވަން ވެސް ވައްކަން ކުރީ ރައްޔިތުންގެ ޖީބުން ކަމަށެވެ.
ރައީސް މުއިއްޒުއާ ޒާތީވުމެއް ނެތްކަމަށާ ހިތްހަމަ ނުޖެހިގެން ހިންގަވާ ނޭދެވޭ ނުރަނގަޅު އަމަލުތަކުގެ ވާހަކަ ދައްކަވަނީ ރައްޔިތުންނަށް އޮޅުވާލާ މަކަރު ހަދައިގެން އުޅުއްވާތީކަމަށް ވިދާޅުވެ ޑރ ޖަމީލް ވަނީ ރައީސް މުއިއްޒުއަށް ފާޑުވިދާޅުވެފައެވެ.
