ނުރައްކާތެރިކޮށް ދެ ލޯންޗެއް ދުއްވާ ވީޑިއޯއެއް މީސްމީޑިޔާގައި އާންމުވުމާއި ގުޅިގެން އެ މައްސަލަ ބަލަމުންދާ ކަމަށް ފުލުހުންގެ އިދާރާއިން ބުނެފިއެވެ.

ފުލުހުން ބުނެފައިވަނީ ނުރައްކާތެރިކޮށް ރޭސް ޖަހާގޮތަށް ދެ ލޯންޗެއް ދުއްވި މައްސަލަ އެ އިދާރާގެ ސަމާލުކަމަށް އައިސްފައިވާ ކަމަށާއި އަދި އެ މައްސަލަ މިހާރު ތަހުގީގު ކުރަމުންދާ ކަމަށެވެ.

ފުލުހުން ވިދާޅުވި ގޮތުގައި ދައުރުވަމުންދާ ވީޑިއޯ އިން ފެނިގެންދާ ލޯންޗުތަކަކީ މިދިޔަ އޮގަސްޓް 13 ވަނަ ދުވަހު އއ.އަތޮޅަށް ދަތުރުކުރި ލޯންޗުތަކެއްކަން ހޯދިފައިވެއެވެ.

މި މައްސަލައިގައި މިހާތަނަށް އެއްވެސް ފަރުދަކު ހައްޔަރުކޮށްފައިނުވެއެވެ.

ދައުރުވަމުންދާ ވީޑިއޯއިން ފެނިގެންދަނީ "ނަސްރު" ނަމަކަށް ކިޔާ ލޯންޗަކާއި "ރިލެކްސް ގޯލްޑު" ނަމަކަށް ކިޔާ ލޯންޗެއް ރޭސް ޖަހާ ގޮތަށް ބާރު ސްޕީޑުގައި ދުއްވާ މަންޒަރެވެ. މި ދެލޯންޗުގެ ފަހަތުން "ރަމްޒު ކުއީން" ނަމަކަށް ކިޔާ ލޯންޗެއް ވެސް ނެރުން ވަދެގެން އައިތަން ވީޑިއޯ އިން ފެނެއެވެ.

މިފަދަ ކަންތައްތަކަކީ ފަރުވާ ކުޑަކުރެވިއްޖެނަމަ ފުރާނައަށް ނުރައްކާވާ ފަދަ މައްސަލަތަކެއް ކަމަށް ފާހަގަކުރަމުން މިފަދަ ކަންކަން މަޖަލަށްވެސް ނުކުރުމަށް ފުލުހުންގެ އިދާރާއިން އިލްތިމާސްކުރެއެވެ.