މަޖިލިސް ރައީސް އަބްދުއްރަހީމް (އަދުރޭ) ވިހަގަދަ ހަރުފައެއްގެ ގޮތުގައި ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ސިފަކުރައްވައިފިއެވެ.

އަދުރޭ ވިހަގަދަ ހަރުފައެއްގެ ގޮތުގައި ޑރ ޖަމީލް ސިފަކުރައްވާފައި ވަނީ އެކްސް އެކައުންޓުން ކުރެއްވި ޕޯސްޓެއްގައެވެ.

އެގޮތުން ޑރ ޖަމީލް ވިދާޅުވީ ގޭތެރޭ ގެންގުޅޭ ވިހަ ހަރުފައަކީ ކޮންމެ ވަގުތަކުވެސް ކަށިޖަހާފާނެ ނުރައްކާތެރި އެއްޗެއްކަމަށެވެ.

އަދުރޭ ރައީސް ޔާމީނުގެ ގޭގައި ނިދައި ކައިބޮއެ އުޅުމަށްފަހު، ރައީސް ޔާމީންގެ ބަދަލުގައި ޖަލުގައި ބާއްވާށޭ ބުނެފައި، އެމަނިކުފާނަށް ލަނޑުދީފަ، މިހާރު ރާވަނީ ރައީސް މުހައްމަދު މުއިއްޒަށް ކެހިދޭންކަމަށް ވިދާޅުވެ ޑރ ޖަމީލް ވަނީ އަދުރޭގެ ހުންނަ މަކަރު ހެދުމާއި އޮޅުވާލުމުގެ ސިފަ ހާމަކޮށްދެއްވާފައެވެ.

އިތުރަށް ޑރ ޖަމީލް ވިދާޅުވީ އަދުރޭ އުޅެނީ ސަރުކާރުގެ މެމްބަރުންގެ ފެކްޝަން ހަދައި މުރައިދޫގޭގައި މަޖްލިސް ފަސާދަ ކުރުމަށް އަވަދި ނެތިކަމަށެވެ.

ދިވެހީންގެ ރާއްޖެެއެއް ހޯދޭނީ 15 އަހަރުވަންދެން ވެރިކަން ކުރެވިގެން ކަމަށް ވިދާޅުވުމާއެކު ހާމަވެގެންދިޔައީ އަދުރޭގެ ހަގީގަތްކަމަށް ބުނެ ގިނަ ފަރާތްތަކުން އަންނަނީ މީސްމިޑިޔާގައި ފާޑުކިޔުން އަމާޒުކުރަމުންނެވެ.