ރައީސް ޑރ މުހައްމަދު މުއިއްޒުގެ ސަރުކާރުން ގެންދަނި އަންހެނުންނަށް ފުރައްސާރަކުރަމުން ކަމަށް މޯލްޑިވިއަން ޑިމޮކްރެޓިކު ޕާޓީ (އެމްޑީޕީ)އިން ބުނެފިއެވެ.

އެމްޑީޕިއިން މިފަދައިން ތުހުމަތުކޮށްފައިވަނީ އެ ޕާޓީގެ އަންހެނުންގެ ރޫހުން ނެރުނު ބަޔާނެއްގައެވެ.

އެ ބަޔާނުގައި ބުނެފައިވަނީ، އިޖުތިމާއީ، އިގްތިސޯދީ އަދި ސިޔާސީ ގޮތުން ވެސް އަންހެނުން ބާރުވެރި ކުރުވުމަށް ނިމިދިޔަ އެމްޑީޕީގެ ސަރުކާރުން ގިނަގުނަ މަސައްކަތްތަކެއް ކޮށް، ބޮޑެތި ކުރިއެރުންތަކެއް ހޯދާފައިވަނިކޮށް، ޕީއެންސީގެ މި ސަރުކާރު އައުމާއެކު މި ހުރިހާ ރޮނގަކުން އަންހެނުންނަށް ލިބެމުން އައި ފުރުސަތުތައް ހަނިކޮށްފައި ވާކަމަށެވެ.

އަންހެނުންނަށް ކުރިމަތިވާ ގޮންޖެހުންތައް ނައްތާލައި، މުޖުތަމައުގެ ހުރިހާ ދައިރާއެއްގައި އަންހެނުންނަށް ފުރިހަމައަށް ބައިވެރިވެވޭނެކަން ކަށަވަރުކޮށްދިނުމަށް މިދިޔަ ފަސް އަހަރު ކުރި މަސައްކަތް ވެސް ހުއްޓިފައި ވާކަމަށް އެމްޑީޕީން ބަޔާޏުގައި ބުނެފައިވެއެވެ.

މީގެ އިތުރުން ޔޫއެންޑީޕީއާ ގުޅިގެން މިދިޔަ ސަރުކާރުން އެކުލަވައިލި ޖެންޑާ އީކުއަލިޓީ އެކްޝަން ޕްލޭންގައި މިއަހަރު ކުރަން ހުރި މަސައްކަތްތައް ކުރިއަށްދާގޮތުގެ ތަފުސީލު ހާމަކުރުން މި ސަރުކާރުން ހުއްޓާލައިފައިވާތީ އެކަމުގެ ކަންބޮޑުވުން ވެސް އެމްޑީޕީން ވަނީ ފާޅުކޮށްފައެވެ.

ހަމަ އެހެންމެ އަންހެނުންގެ ތަރައްގީއަށް އިތުރު މަސައްކަތެއް ނުކޮށްދެވުނު ހާލު، މިއަދު މިޕާޓީގެ އެންމެ ބޮޑު ކަންބޮޑުވުމަކަށް ވެފައި މިވަނީ މި ސަރުކާރުން އަންހެނުންނަށް ކުރާ ފުރައްސާރަ އިތުރުވަމުންދާ މައްސަލައެވެ. ޚާއްސަކޮށް ސިވިލް ސާވިސްގައި މަސައްކަތް ކުރާ އަންހެނުންނަށް މި ސަރުކާރު ވަނީ ބިރަކަށް ވެފައި ކަމަށް ބަޔާނުގައި ވެއެވެ.

އެގޮތުން އެތައް ޒަމާނެއް ވަންދެން ސިވިލް ސާވިސްގައި މަސައްކަތްކޮށްފައި ތިބި ތައުލީމީ، ތަޖުރިބާކާރު އަދި ފަންނީ މުވައްޒަފުންނަށް ސިޔާސީ ބޭނުމަށްޓަކައި ވަޒީފާގެ ބިރު ދައްކައި ނަފުސާނީގޮތުން ގެއްލުންދީ، އެމީހުންގެ ހައްގުތަކަށް މި ސަރުކާރުން އަރައިގަތުން ކުށްވެރިކުރާކަމަށް އެ ބަޔާނުގައިވެއެވެ.

އެމްޑީޕީ ސަރުކާރުން އުފެއްދި "ޖެންޑާ ފެމިލީ އެންޑް ސޯޝަލް ސާވިސަސް" މިނިސްޓްރީގެ ނަމުން "ޖެންޑާ" ވަކިކޮށް އެ މިނިސްޓްރީގެ ނަން "މިނިސްޓްރީ އޮފް ސޯޝަލް އެންދް ފެމިލީ ޑިވަލޮޕްމަންޓް"އަށް ބަދަލުކުރުމުގެ ކަންބޮޑުވުން ފާޅުކުރުމާ އެކު އެ މިނިސްޓްރީއަކީ އަންހެން މުވައްޒަފުންނަށް އެންމެ އަނިޔާވެރި މިނިސްޓްރީކަމަށް ތުހުމަތުކޮށް އެމްޑީޕީން ބުނެފައިވަނީ އެކަމާ ރައްޔިތުން އިންތިހާއަށް ކަންބޮޑުވާ ކަމަށެވެ. އަދި އަންހެނުން ރައްކާތެރިކަން ހޯދުމަށް ދާނެ ތަނެއް މިސަރުކާރުގައި އޮތްކަމާ މެދު މިއަދު އަންހެނުން އެދަނީ ސުވާލު އުފައްދަމުންކަމަށްވެސް އެ ބަޔާނުގައިވެއެވެ.

މީގެ އިތުރުން، މިހިނގާ 20ވަނަ ރައްޔިތުންގެ މަޖިލީހުގައި ސަރުކާރަށް ނިސްބަތްވާ މެމްބަރުން އަންހެނުންނަށް ކުޑައިމީސްވާގޮތަށް މަޖިލީސް ތަޅުމުގައި ތަކުރާރުކޮށް ވާހަކަދައްކާކަން ފާހަގަކޮށް އެ ބަޔާނުގައި ވަނީ، މިކަމުގައި ސަރުކާރުން ހަނުހުރުމަކީ މިފަދަ ކަންކަމުގައި ދެކޭގޮތް ވަރަށް ސާފުކޮށް ހާމަކޮށްދޭ ކަމެއްކަމަށް އެ ޕާޓީން ދެކޭ ކަމަށެވެ.

މިއަދު ރާއްޖޭގައި އަންހެނުން މިތިބި ހިސާބަށް އާދެވިފައި ވަނީ އެތައް ޒަމާނެއްގެ ބުރަ މަސައްކަތުން ކަމަށާއި އަންހެނުން ބާރުވެރިކުރުވުމަށް ކުރަން ހުރި މަސައްކަތް އިންތިހާއަށް ގިނަކަމަށް އެ ޕާޓީން ވަނީ ބުނެފައެވެ. މިފަދަ ދަނޑިވަޅެއްގައި އަންހެނުންނަށް މިހާރު އާދެވިފައިވާ ހިސާބުން އަނެއްކާ ވެސް ފަހަތަށް ޖެއްސުމަށް މި ސަރުކާރުން ކުރާ މަސައްކަތް ހަރުކަށި އިބާރާތުން ކުށްވެރިކުރާ ކަމަށް އެ ބަޔާނުގައި ވެއެވެ.

ޒީފާގެ މާޙައުލުގައި އަންހެނުންނަށް ފުރައްސާރަކޮށް، އަންހެނުންގެ ޙައްޤުތަކަށް އަރައިގަތުމަށް ސަރުކާރުން ހިންގާ ޢަމަލުތައް ހަރުކަށި ޢިބާރާތުން ކުށްވެރިކޮށްފައިވެސް ވެއެވެ.

އެމްޑީޕީން މިފަދައިން ބަޔަނެއް ނެރެފައި މިވަނީ ކ. ގުރައިދޫގައި ހުންނަ ނުކުޅެދުންތެރިކަން ހުންނަ މީހުންގެ މަރުކަޒު ބަލަހައްޓާ ޖެންޑާ މިނިސްޓްރީގެ އެ ޑިޕާޓްމަންޓުގެ ޑިރެކްޓަރު އާއިޝަތު ޝޫޒާ މަގާމުން ވަކިވާން މަޖުބޫރުކުރުވާ ކަމަށް މިދިޔަ ބުރާސްފަތި ދުވަހު އޭނާ ތުހުމަތުކޮށްފައިވަނިކޮށެވެ.