ރައީސް ޑރ. މުހައްމަދު މުއިއްޒު ފާޓު ފުޅާ ވާހަކަ ދައްކަވަނީ ނަތީޖާއަކަށް ވިސްނެވުމެއް ނެތި ކަމަށް ރައީސް އަބްދުﷲ ޔާމީން އަބްދުލްގައްޔޫމު ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ، އިންޑިއާ އާ ގުޅުވާ ރައީސް މުއިއްޒު ކުރިން ދައްކަވާފައި ހުރި ވާހަކަފުޅުތަކަށް އިޝާރާތްކުރައްވާ ޕީއެންއެފްގެ ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ، ސަރުކާރުގެ ނައިބު ވަޒީރުންތަކެއް މެދުވެރިކޮށް އިންޑިއާގެ ބޮޑު ވަޒީރަށް ފުރައްސާރަކުރުވުމަށް ފަހު ނޭނގޭ ކަމަށް ރައީސް މުއިއްޒު ހެއްދެވި ކަމަށާ އަދި އެ ނައިބުންނަށް ފިޔަވަޅު ނޭޅީ ވެސް އެހެންވެ ކަމަށެވެ. ނަމަވެސް މި ފަހަރު ގޮތް ހުސްވެ އިންޑިއާއަށް ސަލާން ޖަހަން ވަޑައިގެންނެވުމުގެ ކުރިން ދީބާޖާއެއްގެ ގޮތުގައި އެ ނައިބުން ވަކިކުރަން ޖެހިވަޑައިގެންނެވުމުން އެ ނައިބުންނަށް އަންގާ އިސްތިއުފާ ހުށަހެޅުއްވި ކަމަށެވެ.

ރައީސް ޔާމީން އިތުރަށް ވިދާޅުވީ، ޗައިނާ ދަތުރުފުޅަށް ފަހު ވަޑައިގެން ތިން ނައިބުންގެ ދިފާއުގައި ރާއްޖޭގެ ހައްގުގައި ކަމަށް ހަދާ އިންޑިއާއަށް އިންޒާރުތައް ރައީސް މުއިއްޒު ދެއްވިއިރު އެ ކުރެވުނީ ކިހާ ވަރެއްގެ ކަމެއް ކަން ރައީސް މުއިއްޒު އަންދާޒާވެސް ކޮށްނުލައްވާ ކަމަށާ އިސްކޮޅާ ނުބައްދަލު ވާހަކަ ދައްކަވާއިރު އެވާހަކަފުޅުތަކުގެ ސަބަބުން ފަހުން ނުކުމެދާނެ ނަތީޖާއަކާ މެދު އެއްވެސް މިންވަރަކަށް ރައީސް މުއިއްޒު ނުވިސްނަވާކަން ވެސް ރައީސް ޔާމީން ފާހަގަކުރެއްވިއެވެ.

ރައީސް ޔާމީން ވިދާޅުވީ އިންޑިއާ ގާތް ގުޅުން ގާއިމުކުރުމަކީ މައްސަލައެއް ނޫން ކަމަށާ ނަމަވެސް އެ ގުޅުމަކީ އިސްތިއުމާރު ކުރާ އުސޫލުން ރާއްޖޭގެ ދާޚިލީ ކަންކަމަށް ނުފޫޒު ފޯރުވާ ރާއްޖޭގެ ޚާރިޖީ ސިޔާސަތު އިންޑިއާގެ ތެރެއިން ބައްޓަންވެގެން ދާނެ ގުޅުމަކަށް ވެގެން ނުވާނެ ކަމަށެވެ.