ރައީސް، ޑރ މުހައްމަދު މުއިއްޒެކޭ 9 ވަނަ ހަސަން ރަސްގެފާނެކޭ ތަފާތެއް ނެތްކަމަށް ޕީއެންއެފްގެ ސެކެރެޓަރި ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

މަލީހު މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.

އެގޮތުން ގައުމުގެ މިނިވަންކަމާ އިސްތިގުލާލު ކޮމްޕްރޮމައިޒް ވާ ގޮތަށް ރައީސް މުއިއްޒު އިންޑިއާ އެކު އެއްބަސްވުންތަކެއް ވުމާ ގުޅިގެން އެކަމާ ނުރުހުން ފާޅުކުރައްވާ މަލީހު ވިދާޅުވެފައިވަނީ ގައުމުގެ ފައްޓަރުބައި ރައީސް މުއިއްޒު ވިއްކަވާލައްވައިފި ކަމަށާ އެހެންކަމުން އިންޑިއާއިން އެނބުރި ރާއްޖެއަށް ވަޑައިގަތުމުގެ ބޭނުމެއް ނެތްކަމަށެވެ.

މީގެ އިތުރުން ނުވަ ވަނަ ހަސަން ރަސްގެފާނާ ރައީސް މުއިއްޒުއާ އެއްވެސް ތަފާތެއް ނެތްކަމަށް ވިދާޅުވެ މަލީހު އިތުރަށް ވިދާޅުވެފައިވަނީ މިއީ ޤައުމަށް ޚިޔާނާތްތެރިވުމުގެ އެންމެ މަތީ މިންވަރުކަމަށެވެ. އަދި މިކަމާ ގުޅިގެން އެމަނިކުފާނުގެ އަރިހުގައި އުޅުއްވާ އަޅު ކުދީންކޮޅުވެސް އެންމެ ފަހުން ބުނާނެ އެއްޗެއް ނޭގި ބަސްހުއްޓިފައިވާ ކަމަށް ވެސް މަލީހު ވަނީ ވިދާޅުވެފައެވެ.

މަލީހު މިފަދައިން ވިދާޅުވެފައި މިވަނީ ރައީސް މުއިއްޒު އިންޑިއާއަށް ނިސްބަތްކޮށް ވަރަށް ގަދަ ބަސް ވިދާޅުވުމަށް ފަހު އެ ބަސްފުޅުތައް ވިދާޅުވާ ނުވާ ބަސްފުޅުތަކަށް ހެއްދެވުމަށް ފަހު ސަލާމުގެ ނާށިގަނޑު ހިއްޕަވައިގެން ރައީސް މުއިއްޒު އިންޑިއާއަށް ވަޑައިގެން އުޅުއްވާ ދަނޑިވަޅަކާ ދިމާކޮށެވެ. އަދި ރައީސް މުއިއްޒު މިހާރު ވަނީ އިންޑިއާގެ ގޮނޑި ކޮއްކޮއަކަށް ވެފައި ކަމަށާ އަދި އިންޑިއާ ފައި ބުޑަށް ވެއްޓި ސަލާން ޖަހަނީ ކަމަށް ބުނެ އިންޑިއާގެ މީޑީޔާތަކުގައި ރިޕޯޓުކޮށް އަދި އެގަމުގެ ރައްޔިތުންވެސް ގެންދަނީ މަލާމާތްކުރަމުންނެވެ.

ރައީސް މުއިއްޒު އިންތިހާބުގެ ކުރިންނާ އަދި ފަހުން ވެސް ދިވެހި ރައްޔިތުންނަށް ވައުދުވެވަޑައިގެންނެވި އެތައް ކަމެއް އަމަލުން ނުފެންނާތީ އާ އަދި ފަހުން އެ ވާހަކަތައް ކެންސަލް ކުރައްވަމުން ގެންދަވާތީ ގިނަ ރައްޔިތުންގެ ނުރުހުން ވަނީ އެމަނިކުފާނަށް އަމާޒުވެފައެވެ. އެގޮތުން ގިނަ ބަޔަކު ގެންދަނި އެމަނިކުފާނަކީ ބަހާ އަމަލާ ދިމާނުވާ ވެރިއެއްގެ ގޮތުގައި ސިފަކުރަމުންކަން ފާހަގަކޮށްލެވެއެވެ.