މިއަހަރުގެ މާޗު މަހު އޮންނަ 20 ވަނަ ރައްޔިތުންގެ މަޖިލިސް އިންތިހާބު އޮބްޒާވު ކުރަން ބޭނުންވާ ފަރާތްތަކަށް ރެޖިސްޓަރީ ވުމުގެ ފުރުސަތު އިލެކްޝަންސް ކޮމިޝަނުން ހުޅުވާލައިފިއެވެ.

އިލެކްޝަންސް ކޮމިޝަނުގެ ނައިބު ރައީސް، އިސްމާއިލް ހަބީބު އެކްސްގައި ކުރެއްވި ޕޯސްޓެއްގައި ވިދާޅުވީ މަޖިލިސް އިންތިހާބު އޮބްޒާވް ކުރައްވަން ބޭނުންވާ މީހުންނަށް އެކަމަށް އެދި ހުށަހެޅުމަށް ބުދަ ދުވަހުން ފެށިގެން އަންނަ ފެބްރުއަރީ 19 ވަނަ ދުވަހުގެ މެންދުރުފަހު 3:00 އާ ހަމައަށް ވަނީ ހުޅުވާލައިފައެވެ.

އިންތިހާބު އޮބްޒާވް ކުރަން ބޭނުންވާ ފަރާތްތަކުން ފޯމު ހުށަހަޅަންޖެހޭނީ ދަރުބާރުގޭގައި ގާއިމުކޮށްފައި ހުރި އީސީގެ އިންތިހާބީ މަރުކަޒަށް ނުވަތަ [email protected] އަށް މެއިލް ކޮށްގެންކަމަށްވެސް އީސީން ވަނީ މައުލޫމާތުދީފައެވެ.

އީމެއިލް މެދުވެރިކޮށް ހުށަހަޅާ ފޯމުތަކުގެ ފައިލް ސައިޒް 10 އެމްބީއަށް ވުރެ ބޮޑުވެގެން ނުވާނެ ކަމަށް ހަބީބު ވަނީ ވިދާޅުވެފައެވެ.

އެއަށްވުރެ ފައިލްސައިޒް ބޮޑު އީމެއިލްތައް ބަލާނީ ހުށަނާޅާ އީމެއިލްތަކެއްގެ ގޮތުގައި ކަމަށް ވެސް ހަބީބު އެކްސްގައި ކުރެއްވި ޕޯސްޓްގައިވަނީ ހާމަކޮށްފައެވެ.

އޮބްޒާވަރުންނަށް ވުމަށް އެދި ހުށަހަޅާއިރު އޮބްޒާވަރަކަށް ވުމަށް އެދޭ ފޯމާއިއެކު އޮބްޒާވަރަކަށް ވުމަށް އެދޭ ފަރާތުގެ އައިޑީކާޑު ކޮޕީއާއި އޮބްޒާވަރަށް ވުމަށް އެދޭ ފަރާތުގެ ފޮޓޯ އަދި އިގުރާރު ހުށަހަޅަން ޖެހޭނެކަމަށް އަދި އޮބްޒާވަރުންގެ ގޮތުގައި ހުށަހަޅަނީ ބައިވަރު މީހުން އެއްކޮށް ނަމަ، އެމީހުންގެ މައުލޫމާތު އެނގޭނެހެން އީސީން ކަނޑައަޅާފައިވާ ފޯމެޓަށް އެކްސެލް ޝީޓެއްގައި ލިސްޓު ކުރަންޖެހޭނެކަމަށްވެސް އީސީން ވަނީ ބުނެފައެވެ.

މަޖިލިސް އިންތިހާބު ބޭއްވުމަށް ނިންމާފައި ވަނީ މާޗު 17 ގަ އެވެ.