ހައިވޭގައި ދުއްވި ސައިކަލެއްގެ ހުންގާނު، ކުޑަކުއްޖަކަށް ހިފަންދިން މައްސަލަ ރައްދުވާ ފަރާތް ފުލުހުންގެ އިދާރާއަށް ގެންގޮސް ސުވާލުކޮށްފި ކަމަށް އެ އިދާރާއިން ބުނެފިއެވެ.

ފުލުހުން އިތުރަށް ބުނެފައިވަނީ، މި މައްސަލާގެ ތެރެއިން ކުޑަކުއްޖަކު ނުރައްކަލަށް ހުށަހެޅޭގޮތަށް ސައިކަލް ދުއްވި މައްސަލަ ވަކިކަމެއްގެ ގޮތުގައި އަދި ޓްރެފިކް ޤަވައިދާ ހިލާފްވި މައްސަލަ ވަކިން ބަލަމުން އަންނަ ކަމަށެވެ.

މީގެ އިތުރުން، މިފަދަ މައްސަލަތައް ސީރިއަސްކޮށް ނަގައި ހަމަޖެހިފައިވާ އުސޫލުން ފިޔަވަޅު އަޅާނެކަމުގެ ޔަގީންކަން ފުލުހުން ވަނީ ރައްޔިތުންނަށް ދީފައެވެ.

ބްރިޖާއި ހައިވޭގައި ޓްރެފިކް ޤަވައިދާ ހިލާފަށް އުޅަނދު ދުއްވާ މީހުންގެ މައްސަލަތައް ދޭތެރެއަކުން ފެންމަތިވެއެވެ. އަދި މިފަދަ މައްސަލަތައް ފުލުހުން އަންނަނީ ހާއްސަ ސަމާލުކަމެއް ދީގެން ބަލަމުންކަން ފާހަގަކުރެވިފައިވެއެވެ.