މި ސަރުކާރުން ވެރިކަމަށް އައީ ބޯހިޔާވަހިކަމުގެ ފޮނި ހުވަފެންތަކެއް ރައްޔިތުންނަށް ދެއްކުމަށްފަހުގައިކަމީ އެއްވެސް ރައްޔިތެއް ދޮގުކުރާނެކަމެއް ނޫނެވެ.ކުރީގެ ރައީސް އިބްރާހިމް މުހައްމަދު ޞާލިހް ވެރިކަން ނިމެން އުޅެނިކޮށް ނުހައްގުން ބަހާލި ގޯއްޗާއި ފްލެޓްތައް ރައްޔިތުންނަށް ދެއްވާނެކަމުގެ ވައުދުވެ، ވެރިކަމަށް އައުމަށްފަހު އެ ފްލެޓްތަކާއި ގޯތި ނުދީ ހިފަހައްޓާ ވާހަކައަކީ ވެސް މިހާރަކަށް އައިސް ރައްޔިތުން ދައްކަމުންދާ ވާހަކައެވެ.

އޭރުވެސް އެ ވައުދުވެވަޑައިގެންނެވި އިރު ގޯއްޗާއި ފްލެޓްތައް ދިނުމުގެ ވިސްނުމެއް ރައީސް ޑރ މުހައްމަދު މުއިއްޒުގެ ނެތްކަމަށް ގިނަ ފަރާތްތަކުން ބުނެ އުޅުނެވެ. ނަމަވެސް އެ ހުރިހާ ވާހަކައެއް ދޮގުކޮށް އެ އެއްޗެހީގެ ހައްގުވެރިންނަށް އެ ދޭނެކަމަށް ރައީސް މުއިއްޒު ވިދާޅުވިއެވެ.

ދޭނެ ކަމަށް ވިދާޅުވި ގޯއްޗާއި ފްލެޓް ނުދީ އަމިއްލަފުޅު ޖީބަށް ލައިގެން އުޅޭތާ 11 މަސްވަނީއެވެ. މިކަމާ ކޮންމެ ހަފްތާއެއްގެ ހުކުރު ދުވަހުގެ ރޭ ހައްގު ހޯދުމަށް ގޯއްޗާއި، ފްލެޓުތައް ދޫކޮށްދިނުމަށް އެދި މާލޭގައި ދަނީ މުޒާހަރާ ކުރަމުންނެވެ.

އެންމެ ފުރަތަމަ ހައްގު ހޯދަން ރައްޔިތުން ފަށާފައި ވަނީ އުސްފަސްގަނޑާ ދިމާލުގައެވެ. އެޔަށްފަހު މުޒާހާރާތައް ރާޅުގަނޑު ސަރަހައްދުގައެވެ.

މުޒާހަރާ ކުރާތީ ހިތައް ކެތްނުވެގެން، މުޒާހަރާތަކުގައި އިސްކޮށް ހަރަކާތްތެރިވާ ފަހި ޔޫނިއަންގެ އިސް އޮފިޝަލުންނާއި، ޖަމިއްޔާތަކުގެ އިސް އޮފިޝަލުންނާއި، 2 ސެޕްޓެންބަރު 2024 ގައި ރައީސް އޮފީހުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ބައްދަލުކުރައްވާފައެވެ. އެ ބައްދަލުކުރެއްވުމުގައި ވެސް އެމަނިކުފާނު ވަނީ ގޯއްޗާއި، ފްލެޓު ދޭނެކަމުގެ ފުރިހަމަ ޔަގީންކަން ދެއްވާފައެވެ. އެއާއެކު މުޒާހަރާތައް މެދުކެނޑިގެން ދިޔައެވެ. ނަމަވެސް އޭގެ ދުވަސްކޮޅެއް ފަހުން އަނެއްކާ ވެސް ރަސްފަންނު ސަރަހައްދުގައި ގޯއްޗާއި، ފްލެޓު ދޫކޮށްދިނުމަށް އެދި ރައްޔިތުންތަކެއް މިވަނީ ސިލްސިލާ މުޒާހަރާތަކެއް ފަށާފައެވެ. މި މުޒާހަރާގެ ބައިވެރިން ތުހުމަތު ކުރާ ގޮތުގައި ފަހި ޔޫނިއަންގެ އިސް އޮފިޝަލުންނާއި، ރައީސް މުއިއްޒު ބައްދަލުކުރެއްވީ މުޒާހަރާ ހުއްޓުވުމުގެ މަގުސަދުގައެވެ. އަދި އެމަގުސަދު ސަރުކާރަށް ހާސިލްވި ކަމަށް މުޒާހަރާގެ ބައިވެރިން ބުނެފައިވެއެވެ. އެއީ މިހާރު ކުރިއަށް ގެންދާ މުޒާހަރާތައް ކުރިއަށް ނުގެންދިއުމަށް އެ ޔޫނިއަންގެ އިތުރުން އިސްކޮށް އުޅުނު ޖަމިއްޔާތަކުން ވެސް ބާރުއަޅާތީ ކަމަށް އެމީހުން ބުނެފައިވެއެވެ.

ކިތަންމެ ވަރެއް ކުރިޔަސް ފްލެޓްތައް ނުދީ، ގޯތިތައް ޖީބަށް ލައިގެން އުޅެންޏާ ރައްޔިތުން މުޒާހަރާކުރާނެތާއެވެ. ހައުސިންގ މިނިސްޓަރު އަލީ ހައިދަރު ކުރައްވަނީ ކީއްބާއޭ ވެސް ހިތައް އަރައެވެ. ގޯތި ދޫކޮށްފައިވާ ސަރަހައްދުތަކުގެ މަސައްކަތްތައް ކުރިއަށް ގެންގޮސްފައިވާ ހިސާބުގެ އެންމެފަހުގެ މައުލޫމާތެއްހާ ހިސާބު ވެސް ހިއްސާނުކުރެއެވެ. ރައްޔިތުން ވާނުވާއެއް ތެރޭ ބެހެއްޓީމާ މިނިސްޓަރ ހައިދަރަށް ލިބެނީ ކޯއްޗެއްތޯއެވެ. ހަގީގަތުގައި ބުނަންޏާ މި މަޝްރޫއުތައް ކުރިއަށް ގެންދާ ކަމެއް ނުވަތަ ނުގެންދާ ކަމެއް ވެސް ނޭނގެއެވެ.

ހައުސިން މިނިސްޓަރު ޑރ. އަލީ ހައިދަރު ވިދާޅުވާ ގޮތުގައި ފްލެޓު ލިސްޓު އޮކްޓޯބަރު މަސްތެރޭގައި އާއްމުކުރާނެއެވެ. މި ހިނގަނީ އޮކްޓޯބަރު މަހެވެ. އެވަރު ހައިދަރަށް ނޭނގެންޏާ ދެން އަޅުގަނޑު ހުންނާނީ ހަނެވެ. އެގޮތުން 32 ޓަވަރުގެ މަސައްކަތްތައް ކުރިއަށްދާއިރު، ފުރަތަމަ 6 ޓަވަރުގެ މަސައްކަތް ނިމޭނީ އޮކްޓޫބަރު މަސް ތެރޭގައި ކަމަށް ވެސްް މިނިސްޓަރު ވިދާޅުވެފައިވެއެވެ. މިހާރު މި ވާހަކަތައް ދައްކާނެނ ހިތްވަރެއް މިނިސްޓަރު ހައިދަރުގެ ނެތެވެ.

ދެން އޮތް އަނެއްކަމަކީ މިހާރު ގެދޮރުވެރިޔާ ޕޯޓަލް އިން ލިބިފައިހުރި ފްލެޓުގެ މައުލޫމާތުތައް ވަނީ ފޮހެލާފައެވެ. ''ޝަރުތު ހަމަވޭ'' މިބައިވެސް ފޯޓަލްއިން ނުފެނެއެވެ. މީގެ އިތުރުން ލިބުނު ޕޮއެންޓްތަކުގެ ތަފްސީލުތައް ފެންނަންނެތްއިރު، 4000 ފްލެޓުގެ އެގްރީމެންޓް ވެސް ފެންނާކަށްނެތެވެ.

ގިނަ ރައްޔިތުންތަކެއް ބޮޑު ކަންބޮޑުވުމެއްގެ ތެރޭގައި ތިބިއިރު ގެދޮރުވެރިޔާގެ ޕޯޓަލް ޑައުންވީ ތޯ ނުވަތަ މައުލޫމާތުގެ އަޕްޑޭޓެއް ގެންނަނީތޯ އަދި ޕޯޓަލްއިން އެއްވެސް މައުލޫމާތެއް ނުފެންނަ ސަބަބާއި ގުޅޭގޮތުން މިނިސްޓަރު ހައިދަރު އެއްވެސް އެއްޗެއް ވިދާޅެއްނުވެއެވެ.

މިނިސްޓަރ ހައިދަރު، މަނިކުފާނާ ރައީސް މުއިއްޒާ ގުޅިގެން ތި އަރައިގަންނަނީ ބައެއްގެ ހައްގަކަށެވެ. ގެދޮރު ނެތިގެން، ހާލުގައި ތިއްބާ ލިބުނު ބޮޑު ނިއުމަތް ވެސް ނިއުޅައިގަތީއެވެ. އަމިއްލަ އެދުމުން ފޯވިޔަސް ތިއީ ފުކެއް ބޮޑުވަރެވެ.