މިއަދު ރާއްޖެއަކީ އިންޑިއާގެ ސްޓޭޓެއްކަމަށް ގަބޫލުކުރެވޭ ކަމަށާ ރައީސް މުހައްމަދު މުއިއްޒަކީ އެ ސްޓޭޓުގެ މަންތިރިޖީ ކަމުގައިވެސް ބެލުމުގެ ފުރުސަތު އެބަ އޮތް ކަމަށް ގާނޫނީ ވަކީލު އާދަމް އާސިފް ވިދާޅުވެއްޖެއެވެ.
އާސިފް މިފަދައިން ވިދާޅުވީ މިދިޔަ ބުރާސްފަތި ދުވަހުގެރޭ ޕީއެންއެފް އޮފީހުގައި ބޭއްވި ޖަލްސާގައި ވާހަކަ ދައްކަވަމުންނެވެ.
އާސިފް ވިދާޅުވީ ރައީސް މުއިއްޒު އިންޑިއާއަށް ކުރެއްވި ދަތުރުފުޅުގެ ތެރެއިން ގޮތް ނޭނގޭ، ހަގީގަތް ނޭނގޭ އެއްބަސްވުންތަކެއް ސޮއިކުރައްވާފައިވާ ކަމަށާ ނަމަވެސް ރައީސް މުއިއްޒު އެމްޑީޕީ ވެރިކަމުގައި އެކަމަށް ނުހަނު ފާޑުވިދާޅުވިކަމަށެވެ.
ކުރީ ސަރުކާރަށް ފާޑުވިދާޅުވުމަށް ފަހު މިހާރުގެ ސަރުކާރުން ވެސް އެ ހަޑި ހާވަމުންދާ ކަން ފާހަގަކުރައްވާ އާސިފް ވިދާޅުވީ، އުތުރު ތިލަފަޅާ އައްޑޫގައި އިންޑިއާގެ ކޮންސިއުލޭޓު އޮފީހެއް ގާއިމުކުރުމުގެ އިތުރުން އިންޑިއާ އަސްކަރީ އުޅަނދުތައް ރާއްޖެ ގެނައުން ފަދަ ކަންކަމަށް އެއްބަސްވެ، ކުރީ ސަރުކާރުން ނުވެސް ކުރާ ކަންކަމާ އެކު މި ސަރުކާރުން އިންޑިއާ ފައި ބުޑަށް ވެއްޓިއްޖެ ކަމަށެވެ.
އަޅުގަޑަށް ބޮޑަށް ގަބޫލު ކުރެވެނީ ރާއްޖެ އަދި އޮންނާނީ އިންޑިއަން ޓެރިޓަރީއެއް ގޮތަށް ކަމަށް. ދެން ސްޓޭޓަކަށް ފަހުން ބަދަލުވެދާނެ. އެހެންވީމަ މިތަނުގައި ހުރި މަންތްރީ ޖީ މުއިއްޒަކީ. އިންޑިއާއިން މިތަނަށް ކަނޑައަޅާފައި ހުންނަ ގަވަރުނަރު މިއީ. އެއް މަސް ދުވަހުގެ ކާޑާ ފެނާ ގަންނާނެ މިންވަރު ގައުމުގެ ބައިތުލް މާލުގައި ނެތުމަކީ ގައުމުގެ މިނިވަންކަން ވިއްކާލަން ނަމަވެސް ޖެހޭ ސަބަބެއް ނޫން.
އާސިފް
އާސިފް ވަނީ މާލެ ސަރަހައްދުގައި އުޅޭ ރައްޔިތުން އުތުރު ތިލަފަޅު ބަލާލާން ދާން ވެސް ގޮވާލައްވާފައެވެ. އާސިފް ތުހުމަތު ކުރެއްވި ގޮތުގައި ރައީސް މުއިއްޒު ވަޑައިގެންނެވީ އެ ސަރަހައްދުވެސް އިންޑިއާއަށް ވިއްކަވާލައްވާފައެވެ.
