ލުބުނާނުގެ އުތުރުގެ ސަރަހައްދަށް ސަހްޔޫނީން ދިން ވައިގެ ހަމަލާއެއްގައި 18 މީހުން ޝަހީދުވެފައިވާ ކަމަށް ލުބުނާނުގެ ރެޑް ކްރޮސް އިން ބުނެފި އެވެ.

ސަހްޔޫނީން ދަނީ ލުބްނާނުގެ އެކި ސަރަހައްދުތަކަށް ވައިގެ މަގުން ގިނަ އަދަދެއްގެ ހަމަލާތައް ފޮނުވަމުންނެވެ.

މި ހަމަލާތަކުގެ ރައްދުގައި ލުބްނާނުގައި ހަރަކާތްތެރިވާ ހިޒްބުﷲ ޖަމާއަތުންވެސް ދަނީ ސަހްޔޫނީންނަށް ވަރުގަދަ މިސައިލް ހަމަލާތައް އަމާޒުކޮށް ހަނގުރާމަ ވަރުގަދަ ކުރަމުންނެވެ.

ސަހްޔޫނީން ދެމުންދާ ހަމަލާތަކުގައި މިހާތަނަށް 2000 އަށް ވުރެ ގިނަ މީހުން ވަނީ ޝަހީދުވެފައިވާ ކަމަށް މީޑިޔާތަކުން ރިޕޯޓްކޮށްފައިވެއެވެ.

މީގެ އިތުރުން، ޣައްޒާގެ މެދުތެރޭގައި އޮންނަ ދީރް އަލް ބަލާހްގައި ހުންނަ އަލް އަޤްޞާ ހޮސްޕިޓަލްގެ ދަނޑުގައި ފަލަސްތީނުގެ ގެދޮރު ގެއްލިފައިވާ ޓެންޓް އެންކޭމްޕްމަންޓް ތަކަށް ސަހްޔޫނީންގެ ހަނގުރާމަމަތީ މަތިންދާބޯޓުތަކުން ދިން ބޮމުގެ ހަމަލާއެއްގައި ފަލަސްތީނުގެ ހަތަރު މީހަކު ޝަހީދުވެ އެތައް ބަޔަކު ޒަޚަމްވެފައިވާ ކަމަށްވެސް މީޑިޔާތަކުން ވަނީ މިއަދު ރިޕޯޓްކޮށްފައެވެ.