ސަހްޔޫނީން ނެރުނު އަމުރުގެ ސަބަބުން މުޅި ލުބުނާނުގެ 4 ބައި ކުޅަ 1 ބަޔައް އަސަރުކޮށްފައިވާ ކަމަށް އދ ގެ ފަރާތުން މެދު އިރުމައްޗައް ކަނޑައަޅާފައިހުންނަ ރެފިއުޖީންގެ ހައިކޮމިޝަނަރު، ރެމާ ޖަމޫސް އިމްސެއިސް ވިދާޅުވެއްޖެއެވެ.

އެ ސަރަޙައްދުގައި ތިބި މީހުން ސަރަޙައްދު ހުސްކުރުމަށް ސަހްޔޫނީން އަންގާ އެންގުން ތަކަށް ސަމާލުކަންދެމުންދާ ކަމަށާއި އަދި އެމީހުން ފިލަނީ ހުސް އަތާއި އެކު ކަމަށް ޖެނީވާގައި ބޭއްވި ނިއުސް ބްރީފިންގައި އޭނާ ބުނެފައިވެއެވެ.

ސަހްޔޫނީނުން ގެދޮރު ދޫކޮށް ނުކުތުމަށް އަދި ބޮމުގެ ހަމަލާތަކާ ކުރިމަތިލާން ޖެހޭނެކަމުގެ އިންޒާރުދީ ނެރުނު އަމުރުތަކަށް ފަހު 1.2 މިލިއަނަށް ވުރެ ގިނަ މީހުން ގެދޮރު ހުސްކޮށްފައިވާކަމަށް ރިޕޯޓްކޮށްފައިވެއެވެ.

ލުބުނާނުގެ ދެކުނަށް ސަހްޔޫނީން ދިން ކުއްލި ހަރުކަށި ހަމަލާތަކުގައި ފާއިތުވި ދުވަސްތަކުގެ ތެރޭގައި މަދުވެގެން 2،309 މީހުން މަރުވެފައިވާ ކަމަށް ލުބުނާން ސަރުކާރުން ބުނެފައިވެއެވެ. އަދި ގިނަ ބަޔަކު މަރާލާފައިވަނީ ސެޕްޓެމްބަރު މަހުގެ ފަހުކޮޅު ސަހްޔޫނީން އަސްކަރީ ކެމްޕޭން ފުޅާކުރި ފަހުން ކަމަށްވެސްވެއެވެ.