ސިޔާސީ ޕާޓީ އުފެއްދުމުގެ ހުއްދައަށް އެކަކަށްވުރެ ގިނަ މީހުންނަށް އެދެވޭ ގޮތަށް ސިޔާސީ ޕާޓީތަކުގެ ގަވާއިދު އިސްލާހު ކޮށްފިއެވެ.

މިގެ ކުރިން ސިޔާސީ ޕާޓީއެއް އުފެއްދުމުގެ ހުއްދަ ދެނީ އެންމެ ފަރާތަކަށެވެ. އެހެންނަމަވެސް މިހާރު ވަނީ މި ގަވާއިދަށް ބަދަލުގެނަސް އެކަކަށް ވުރެ ގިނަ ފަރާއްތަކަށް ހުށައެޅިދާނެއެވެ.

އިލެކްޝަންސް ކޮމިޝަން (އީސީ) އިން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުގެ ނައިބު ރައީސް އިސްމާއީލް ހަބީބު ވިދާޅުވީ މި އިސްލާހަކީ ގިނަ ބައެއްގެ ކަންބޮޑުވުމާ ގުޅިގެން އެ ކޮމިޝަނުން މަޝްވަރާކޮށްގެން ގެނެސްފައިވާ އިސްލާހެއް ކަމަށެވެ.

ސިޔާސީ ޕާޓީގެ ގަވާއިދަށް ގެނަސްފައިވާ އާ އިސްލާހުގައި ވަނީ ޕާޓީ އުފެއްދުމުގެ ހުއްދައަށް އެދި އެކަކަށް ވުރެ ގިނަ މީހުންނަށް ހުށަހެޅިދާނެ ކަމަށެވެ. އަދި އެ ކަމަށް އެދި ހުށަހަޅާ ފޯމާ އެކު ޕާޓީ އުފައްދަން ބޭނުންވާ މީހުންގެ އައިޑީ ކާޑުގެ ސާފު ކޮޕީއަކާއި ކުށުގެ ރިކޯޑު ފޯމު ހުށަހަޅަންޖެހޭނެ ކަމަށްވެސް ގަވައިދުގައި ވެއެވެ.

ޕާޓީއެއް އުފެއްދުމުގެ ހުއްދަ އަށް އެދޭތާ ހަތް ދުވަހުގެ ތެރޭގައި އެ ހުއްދަ ލިޔުމުން ދޭން ޖެހޭނެ ކަމަށް ވެސް އެ ގަވާއިދުގައި ބަޔާންކޮށްފައިވެ އެވެ.

ސިޔާސީ ޕާޓީއެއް އުފެއްދުމުގެ ހުއްދަ އީސީ އިން ދިނުމުން ޕާޓީ ރަޖިސްޓަރީ ކޮށްދޭނީ މަދުވެގެން 3،000 މީހުންގެ ސޮޔާ އެކު ހުށަހެޅުމުންނެވެ. ދައުލަތުން ސިޔާސީ ޕާޓީތަކަށް ދޭ ފައިސާ ލިބޭނީ 10،000 މީހުން ހަމަވާ ޕާޓީތަކަށް އެކަނިއެވެ.