ރައްޔިތުންގެ މަޖިލީހުގެ އިންތިހާބުގެ ކަންކަން ބެލެހެއްޓުމަށް ފުލުހުންގެ ހާއްސަ ކޮމާންޑަރުން ކަނޑައަޅައިފިއެވެ.

ހާމަކުރައްވާފައިވަނީ މަޖިލިސް އިންތިހާބުގެ ސަލާމަތީ ކަންކަން ބެލެހެއްޓުމާއި ގުޅޭ ގޮތުން މިއަދު އިލެކްޝަންސް ކޮމިޝަނާއި އެކީ ސޮއި ކުރުމަށް ބޭއްވި ރަސްމިއްޔާތުގައި ކޮމިޝަނަރ އޮފް ޕޮލިސް އަލީ ޝުޖާއުއެވެ.

މި ފަހުމާނާމާގައި ފުލުހުންގެ ފަރާތުން އަލީ ޝަޖުާއު ސޮއި ކުރައްވާފައިވާއިރު، އިލެކްޝަންސް ކޮމިޝަންގެ ފަރާތުން ސޮއި ކުރައްވާފައިވަނީ އެ ކޮމިޝަންގެ ނައިބު ރައީސް، އިސްމާއީލް ހަބީބެވެ.

ދަރުބާރު ގޭގައި އޮތް އެ ރަސްމިއްޔާތުގައި ވާހަކަ ދައްކަވަމުން ޝުޖާއު ވަނީ ކުރިއަށް އޮތް މަޖިލިސް އިންތިހާބަކީ ވެސް މުޅިން އާ އިންތިހާބެއް ކަމުގައި ދެކި، އިންތިހާބުގައި ދިމާވެދާނެ އެންމެހައި ކަންތައްތަކަށް ފުލުހުންގެ ހިދުމަތުން ތައްޔާރުވަމުން އަންނަ ކަމަށް ވިދާޅުވެފައެވެ.

އެގޮތުން އިންތިހާބަށް ހާއްސަ ކޮމާންޑަރުން ކަނޑައަޅައި، އެހެނިހެން މަސައްކަތްތައް އިތުރަށް ތަންފީޒު ކުރުމަށްޓަކައި ކޮމިޓީއެއް އެކުލަވާލައި މަސައްކަތްތަކެއް ކުރަމުން އަންނަ ކަމަށް ޝުޖާއު ވިދާޅުވިއެވެ.

ފަހުމުނާމާއަކީ އިލެކްޝަންސް ކޮމިޝަނުން ކުރާ އިންތިހާބާ ގުޅުން ހުރި މަސައްކަތްތައް ކުރުމަށް މަގުފަހިކޮށްދިނުމަށް ސޮއިކުރެވުނު ފަހުމުނާމާއެކެވެ.

މި ފަހުމުނާމައިގައި ފުލުހުންގެ އިތުރުން ހަތަރު މުއައްސަސާއަކުން ސޮއިކޮށްފައިވެއެވެ. އޭގެ ތެރޭގައި ހިމެނެނީ ސިވިލް ސާވިސް ކޮމިޝަން، ޑިޕާޓްމަންޓް އޮފް ނެޝަނަލް ރަޖިސްޓްރޭޝަން، ލޯކަލް ގަވަރމަންޓް އޮތޯރިޓީގެ އިތުރުން، މޯލްޑިވްސް ޕޯސްޓެވެ.

ފަހުމުނާމާތަކުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން އީސީގެ ނައިބު ރައީސް އިސްމާޢީލް ޙަބީބް ވިދާޅުވީ، ފަހުމުނާމާތަކުގައި ސޮއި ކުރި ހުރިހާ މުއައްސަސާތަކަކީވެސް އިންތިޚާބު ފުރިހަމަވުމުގައި މުހިންމު ދައުރެއް އަދާކުރާ މުއައްސަސާތަކެއް ކަމަށެވެ.

އިންތިޚާބަށް އޮފިޝަލުން ހޯދުމާއި، ރަށްރަށުގައި ފޯކަލް ޕޮއިންޓުތައް ޤާއިމްކުރުމުގައި ސިވިލް ސާވިސް ކޮމިޝަނުގެ އެއްބާރުލުން ބޭނުންވާނެ ކަމަށް ޙަބީބް ވިދާޅުވިއެވެ. އަދި ފުލުހުންގެ އެހީތެރިކަން ފާހަގަކޮށް އެކި ތަންތަނަށް ވޯޓު ކަރުދާހާއި، އޮފިޝަލުން ދާއިރު މިހާރު ފޮނުވަނީ ފުލުހުންގެ ވެހިކަލްތަކުގައި ކަމަށާއި މިކަން ކުރުމުން ސަލާމަތީ ގޮތުން ބޮޑު ރައްކާތެރިކަމެއް ލިބޭ ކަމަށް ހަބީބް ވިދާޅުވިއެވެ.