ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) ގެ މެނޭޖިންގެ ޑިރެކްޓާރ އިބްރާހިމް ފަޒުލް ރަޝީދު، އޭނާގެ އަންހެނުން އަދި އިތުރު 5 މީހަކަށް ހާއްސަ އުސޫލެއްގެ ދަށުން ބިން ވިއްކި މައްސަލައާ ގުޅިގެން އިސްތިއުފާއަށް ގޮވަން ފަށައިފިއެވެ.

ބިން ވިއްކި މައްސަލަ ހޫނު ވުމާއި ގުޅިގެން އެކްސްގައި ފަޒުލް ކުރި ޕޯސްޓްގެ ކޮމެންޓް ސެކްޝަންގައި ގިނަ ބަޔަކު ވަނީ އޭނާ އެޗްޑީސީގެ މެނޭޖިންގެ ޑިރެކްޓަރުކަމުން އިސްތިއުފާއަށް ގޮވާލާފައެވެ.

ކޮމެންޓްތަކުގައި ވާގޮތުން ހުޅުމާލޭގެ ގިނަ ރައްޔިތުން އަންނަނީ ފަޒުލް ހުޅުމާލެއަށް އިހުމާލުވާ ވާހަކަ ދައްކަމުންނެވެ. އޭގެއިތުރުން އިދިކޮޅުގައި އޮވެ އެމްޑީޕީ ސަރުކާރުން ވައްކަންކޮށް ކޮރަޕްޝަން ހިންގަމުންދިޔުމުން އެކަމާ ދެކޮޅަށް ވާހަކަދެއްކުމަށްފަހު ވެރިކަން ލިބުމުން ފަޒުލް ވެސް ކުރަނީ އެއްކަމެއް ކަމަށް އެ ފަރާތްތަކުން ވަނީ ބުނެފައެވެ.

ފަޒުލް އޭނާގެ އަންހެނުންނަށް ބިން ދިން ވާހަކަ މީގެކުރިން ވެސް ވަނީ މީސްމީޑިޔާގައި ދެކެވިފައެވެ. އެހެންނަމަވެސް ފަޒުލް އަންނަނީ އެ ތުހުމަތުތައް ދޮގުކުރަމުންނެވެ.