މިހާރު މިގައުމަކީ ވަގުންގެ ރާއްޖެއެއްގެ ގޮތުގައި ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ސިފަކުރައްވައިފިއެވެ.

ޑރ ޖަމީލު މިފަދައިން ސިފަކުރެއްވީ އެކްސްގައި ކުރެއްވި ޕޯސްޓެއްގައެވެ.

އެގޮތުން އެޗްޑީސީގެ އެމްޑީކަމުގައި ހުރެ އަމިއްލަ ބޭބެއަށް ހުޅުމާލެއިން ވަގަށް ބިމެއް ދިން މައްސަލައިގައި ސަސްޕެންޑުކުރުމުން އިސްތިއުފާދިން އިބްރާހިމު ފަޒުލް ރަޝީދު، ކޮރަޕްޝަނާ ދެކޮޅު ކަމަށް ބުނާ ޕީއެންސީގެ، ވ. އަތޮޅުގެ ކެމްޕެއިން މެނޭޖަރަކަށް ހަމަ ޖެއްސި ކަމަށްބުނާ ޚަބަރެއް ހިއްސާކުރައްވާ ޑރ ޖަމީލު ވިދާޅުވީ ރައީސް މުއިއްޒާ ފަޒުލްއަކީ އެކަކު އަނެކަކުގެ ރޯލް މޮޑެލްތައް ކަމަށެވެ. އެހެންކަމުން ކުޑަ ސޯބުތައް އެންބުރޭނީ ބޮޑު މައި ސޯބުވެސް އެނބުރޭ ގޮތަށް ކަމަށް ވިދާޅުވެ ޑރ ޖަމީލުގެ ޕޯސްޓު ނިންމަވާލައްވާފައިވަނީ ސްލޯގަން އަކުންނެވެ.

އެގޮތުން "ވަގުންގެ ރާއްޖެ- ޕީއެންސީގެ ރާއްޖެ" މި ސްލޯގަން އިން ޑރ ޖަމީލު އެކްސް ޕޯސްޓު ނިންމަވާލައްވާފައިވާއިރު، ރައީސް ޑރ މުހައްމަދު މުއިއްޒުގެ ސަރުކާރަށް ތުހުމަތުވާ ކޮރަޕްޝަން، ވައްކަމުގެ މައްސަލައެއް ތިލަ ނުވާ ދުވަހެއް މިފަހަކަށް އައިސް ފާއިތުވެ ނުދާކަން ފާހަގަކޮށްލެވެއެވެ.