އުތުރު ޣައްޒާގެ ބެއިތު ލާހިޔާއަށް ސަހްޔޫނީން ދިން ހަމަލާގައި 73 މީހުން ޝަހީދުވެއްޖެއެވެ.

ގިނަ ބަޔަކު އިމާރާތްތަކުގެ ދަށުގައި ތާށިވެފައި ތިބިއިރު މަރުވާ މީހުންގެ އަދަދު އިތުރުވާނެ ކަމަށް ލަފާކުރެވޭ ކަމަށް ޣައްޒާގެ ސަރުކާރުގެ މީޑިއާ އޮފީހުން ވަނީ ބުނެފައެވެ.

ޣައްޒާގެ އުތުރުގައި މުވާސަލާތީ ވަސީލަތްތައް ކަރަންޓް ކެނޑިފައިވާތާ 16 ދުވަސް ވެފައިވާ ކަމަށް ބައެއް މީޑިޔާތަކުން އަންނަނީ ރިޕޯޓްކުރަމުންނެވެ.

ޣައްޒާގެ ދެކުނުގައި އޮކްސްފޭމް އިން ބުނާ ގޮތުގައި ސަހްޔޫނީން ދިން މި ހަމަލާގައި ޚާން ޔޫނިސް ކައިރީގައި އިމާރާތްތައް މަރާމާތު ކުރަން ދަތުރުކުރި ހަތަރު އިންޖިނިއަރުންނާއި މަސައްކަތްތެރިން ޝަހީދުވެފައިވެއެވެ.

ޣައްޒާގައި އޮކްޓޯބަރު 7، 2023 އިން ފެށިގެން ސަހްޔޫނީން ދިން ހަމަލާތަކުގައި މަދުވެގެން 42،519 މީހުން ޝަހީދުވެ 99،637 މީހުން ޒަޚަމްވެފައިވާއިރު، 2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހު ހަމާސްއިން އެގައުމަށް ދިން ހަމަލާތަކުގައި މަދުވެގެން 1،139 މީހުން މަރުވެ، 200 އަށް ވުރެ ގިނަ މީހުން އަޅުވެތިކޮށްފައިވެއެވެ.