ބާލިންގައި ހުންނަ ސަހްޔޫނީންގެ އެމްބަސީއަށް ހަމަލާދޭން ރާވަމުން ދިޔަ އައިއެސް ޖަމާއަތާ ގުޅުން އޮތް ކަމަށް ބެލެވޭ ލީބިޔާގެ ރައްޔިތަކު ޖަރުމަނުވިލާތުން ހައްޔަރުކޮށްފިއެވެ.

ފެޑެރަލް ޕްރޮސެކިއުޓަރުގެ އޮފީހުން އާދީއްތަ ދުވަހު ނެރުނު ބަޔާނެއްގައި ބުނެފައިވަނީ ވެރިރަށް ބާލިންގެ ބޭރުގައި އޮންނަ އަވަށެއް ކަމަށްވާ ބާނާއުއިން ހޮނިހިރު ދުވަހުގެ ރޭ ފުލުހުންނާއި އެހެނިހެން ސަލާމަތީ ބާރުތަކުން އެމީހާ ހައްޔަރުކޮށް އޭނާގެ ގެ ބަލައި ފާސްކޮށްފައިވާ ކަމަށެވެ.

މި މީހާއަކީ އުމުރުން 28 އަހަރުގެ މީހެއްކަމަށް ޕްރޮސެކިއުޓާ އޮފީހުން ވަނީ ފާހަގަކޮށްފަ އެވެ.

އަދި ބޮން ސިޓީ ކައިރީގައި ހުރި އެހެން މީހެއްގެ ގެ ވެސް ސަލާމަތީ ބާރުތަކުން ބަލައި ފާސްކުރި ކަމަށާއި އެއީ ހެކިވެރިއެއްގެ ގޮތުގައި ބެލެވޭ ނަމަވެސް ޝައްކު ކުރެވޭ މީހެއް ނޫން ކަމަށް އެ ބަޔާނުގައި ވެ އެވެ.