މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ)އިން މި އަހަރު ކިރި މަހުގެ މިންވަރު ތިން ގުނަ މަދުކަން ހާމަވެއްޖެއެވެ.

މިފްކޯއިން ހާމަކުރި ތަފާސް ހިސާބުން ދައްކާ ގޮތުގައި މިދިޔަ އަހަރު ވަނީ 72،686 (ހަތްދިހަ ދެ ހާސް ހަ ސަތޭކަ އަށްޑިހަ ހަ ) މެޓްރިކް ޓަނުގެ މަސް ކިރާފައެވެ. މިއަހަރުގެ މިހާތަނަށް މިފްކޯއަށް ކިރާފައި ވަނީ 28،951 (އަށާވީސް ހާސް ނުވަ ސަތޭކަ ފަންސާސް އެކެއް) މެޓްރިކް ޓަނުގެ މަހެވެ. އެއީ، މިދިޔަ އަހަރާ ބަލާއިރު، 43،735 (ސާޅީސް ތިން ހާސް ހަތް ސަތޭކަ ތިރީސް ފަސް) މެޓްރިކް ޓަނުގެ ތަފާތެކެވެ.

އެގޮތުން، މިދިޔަ އަހަރުގެ ޖެނުއަރީ މަހުގައި 7،528 (ހަތް ހާސް ފަސް ސަތޭކަ އަށާވީސް) މެޓްރިކް ޓަނުގެ މަސް ކިރާފައިވާއިރު، މި އަހަރުގެ ޖެނުއަރީ މަހު ކިރާފައި ވަނީ 7،452 (ހަތް ހާސް ހަތަރު ސަތޭކަ ފަންސާސް ދެ) މެޓްރިކް ޓަނު މަހެވެ.

މި އަހަރުގެ ފެބްރުއަރީ މަހު 5،860 ( ފަސް ހާސް އަށް ސަތޭކަ ފަސްދޮޅަސް) މެޓްރިކް ޓަނު، 9،035 ( ނުވަ ހާސް ތިރިސް ފަސް) މެޓްރިކް ޓަނުގެ މަސް މިދިޔަ އަހަރު ކިރާފައިވެއެވެ.

މިފްކޯއިން އެންމެ ފަހުން އާންމުކޮށްފައިވާ ހިސާބުތަކުން ދައްކާގޮތުން، އެކުންފުނިން މަސް ކިރުމަށް ފަހު އޮޑިވެރިންނަށް ދައްކަން ޖެހޭ 9.1 މިލިއަން ރުފިޔާ އެބައޮތެވެ. އެއީ 331 ދޯންޏަކަށް ދޭންޖެހޭ ފައިސާގެ އަދަދެވެ.

މިފްކޯއިން ހާމަކޮށްފައިވާ ގޮތުގައި އެ ފައިސާ ވީ އެންމެ އަވަހަކަށް ދެވޭނެ އިންތިޒާމުތައް ހަމަޖެއްސޭތޯ ދަނީ މަސައްކަތްކުރަމުންނެވެ.