ބައިނަލްއަގުވާމީ ގޮތުން ހަނގުރާމަ ތަކުގައި ބޭނުންކުރުން މަނާކޮށްފައިވާ ކެމިކަލް ހަތިޔާރެއްކަމަށްވާ ވައިޓް ފޮސްފަރަސް ބޭނުންކޮށްގެން، ސަހްޔޫނީން ލުބުނާނަށް ބޮން އަޅާފައިވާކަމަށް އެގައުމުގެ ނޫސްތަކުން ރިޕޯޓްކޮށްފިއެވެ.
ލުބުނާނުގެ ދައުލަތުގެ މީޑިއާ އެޖެންސީން ރިޕޯޓްކުރި ގޮތުގައި، ސަހްޔޫނީން ވަނީ ވައިގެ މަގުން އެގައުމުގެ އަވަށެއްކަމަށްވާ ކްފަރު ޝުބާ އަށް އަމާޒުކޮށް ހަމަލާދީފައެވެ. ފޮސްފަރަސް ހިމެނޭ ބޮންތަކުން ދިން މި ހަމަލާގެ ސަބަބުން އެގައުމުގެ ޖަންގަލީގައިވަނީ އަލިފާން ރޯވެފައެވެ.
މީގެ އިތުރުންވެސް، ސަހްޔޫނީން ވަނީ އެ ސަރަހައްދާއި ކައިރީގައިވާ އަލް-ޤަންތަރަ އަށް ވެސް ހަމަލާ އަމާޒުކޮށް، ބެއިރުތުގެ ދެކުނަށް ވެސް ހަމަލާ ދީފައެވެ.
މީގެ ކުރިންވެސް އެ ގައުމުން ވަނީ މިއަހަރުގެ މާޗު މަސްތެރޭގައި ލުބުނާނަށް އަމާޒުކޮށް ވައިޓް ފޮސްފަރަސް ހިމެނޭ ބޮންތަކެއް އަޅާފައެވެ.
