ޗެނަލް 13 ހިންގާ މައި ކުންފުނި "މީޑިޔާ ރިންގ ޕްރައިވެޓް ލިމިޓެޑް" އުވާނުލަން އިކޮނޮމިކް މިނިސްޓްރީން ނިންމުމާއެކު ޗެނަލް 13 ގެ ބްރޯޑްކާސްޓިންގ ލައިސެންސް ބާތިލް ކުރުމުގެ މަސައްކަތް މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) އިން ހުއްޓާލައިފި އެވެ.

މިކަމާ ގުޅިގެން ޗެނަލް 13 ގެ ސީއީއޯ އިސްމާއިލް ސޮފްވާން ތޭރައޮންލައިނަށް ވިދާޅުވީ އިކޮނޮމިކް މިނިސްޓްރީން ކުންފުނި އުވާލަން ނިންމެވީ އޮޅުމަކުންކަމަށެވެ. ކުންފުނި ވައިންޑިންގ އަޕް ޕްރޮސެސްއަށް ގޮސްފައި އޮތީ މީރާއަށް ދައްކަންޖެހޭ އަހަރީ ފީ ނުދެއްކުމުގެ ސަބަބުންކަމަށް ބުނި އިރު، އަހަރީ ފީ ވާނީ ދައްކާފައިކަމަށް ވެސް ސޮފްވާން ވިދާޅުވިއެވެ.

އިކޮނޮމިކް މިނިސްޓްރީން ވެސް މިހާރު ވަނީ ވެބްސައިޓްގައިވާ ވައިންޑިން އަޕް ސްޓޭޓަސް ބަދަލުކޮށްފައެވެ.

ޗެނަލް 13ގެ ބްރޯޑްކާސްޓިން ލައިސަންސް އުވާލުމުގެ މަސައްކަތް މީގެ ކުރިން ބްރޯޑްކޮމް އިން ފަށާފައިވަނީ މައި ކުންފުނި މީޑިޔާ ރިންގް ވައިންޑިން އަޕްގެ މަރުހަލާގައި އޮތުމުންނެވެ. މިކަމާ ގުޅިގެން ތޭރަ އޮންލައިންއާ ވާހަކަ ދައްކަވަމުން އެ ކޮމިޝަންގެ ނައިބު ރައީސް މުހައްމަދު ފަޒީން ވިދާޅުވީ މިކަމާ ގުޅިގެން ބައްދަލުވުމަށް ޗެނަލް13 އިން ހާޒިރުވިކަމަށެވެ. އެވަގުތު ކުންފުނި އޮތީ ވައިންޑިން ލިސްޓުގައި ނޫން ކަމަށާއި ކުންފުނި މިހާރު އޮތީ ކުންފުނިތަކުގެ ރަޖިސްޓްރީގައިކަމަށެވެ.

އެހެންކަމުން ލައިސެންސް އުވާލުމުގެ މަސައްކަތް ހުއްޓާލުމަށްފަހު، އެކަމުގައި ދެން އަމަލު ކުރާނެ ގޮތެއް ކަނޑައަޅަން ކޮމިޝަންގެ ބައްދަލުވުމަށް އެޖެންޑާ ކުރަން ނިންމާފައިވާ ކަމަށް ވެސް އޭނާ ވަނީ ވިދާޅުވެފައެވެ.

ޗެނަލް 13 އަކީ ސަރުކާރު ޖަވާބުދާރީ ކުރުވުމަށް ގަދަޔަށް މަސައްކަތް ކުރާ ޓީވީ ސްޓޭޝަނެކެވެ. ޗެނަލް 13 ހިންގާތާ މިހާރު 11 ވަރަކަށް އަހަރު ވަނީ ވެފައެވެ. އެހާ ގިނަ ދުވަސްވީ ޓީވީ ޗެނަލަށްވާއިރު، މި ޗެނަލަކީ އަދިވެސް ބެލުންތެރިންގެ ތެރޭ މަގުބޫލު ޓީވީ ޗެނަލެއްކަން ފާހަގަކޮށްލެވެއެވެ.