ގައުމުގެ ދިފާއުކުރަން ހުވާކޮށްގެން ތިބެމެ، ގައުމާ ރައްޔިތުންގެ ހައްގުގައި ބަސް ބުނަން ޖެހޭ ހާލަތްތަކުގައި ބަސް ނުބުނެވޭނަމަ ރައްޔިތުންގެ ޓެކްސް ފައިސާއިން މުސާރަ، ގައުމީ ދިފާއި ބާރުން ނުނެގުމަށް، ކުރީގެ ކޮމިޝަނަރ އޮފް ޕޮލިސް ހުސެއިން ވަހީދު ގޮވާލައްވައިފިއެވެ.

ހުސެއިން މިފަދައިން ގޮވާލާފައިވަނީ ހޯމަ ދުވަހުގެރޭ ޕީއެންއެފް އޮފީހުގައި އޮތް ޖަލްސާގައި، އުތުރު ތިލަފަޅުގެ އެގްރިމަންޓާ ގުޅިގެން ސިފައިން ރައީސް މުހައްމަދު މުއިއްޒު ޖަވާބުދާރީ ނުކުރުވާތީ އެކަމާ ގުޅިގެން ނުރުހުން ފާޅުކުރައްވާ ދެއްކެވި ވާހަކައިގައެވެ.

ހުސެއިން ވިދާޅުވީ، އުތުރުތިލަފަޅާ ދިމާއަށް ދަތުރުކުރާއިރު މިހާރު ފެންނަ މަންޒަރަކީ ބޮޑުކޮށް ހުސްކޮށް އޮތްކަމަށް ބުނާ އެ ރަށުގެ މަލަމަތީގައި ފާރަވެރިވެ ބަޔަކު ސަފު ސަފަށް އެތުރިގެން ތިބޭ މަންޒަރު ކަމަށެވެ.

މި މަންޒަރުތަކުން ހާމަވަނީ ދިވެހިރާއްޖޭގޭ ސަލާމަތް އޮތް ހާލަތު ކަމަށާ މި ދަރަޖައިގައި ގައުމު އޮތްއިރު، ދިވެހި ސިފައިންނާ ގައުމު ހަވާލުކޮށް ހިތްހަމަ ޖެހިގެން ގެއަށް ވަދެ ނިދުމުގެ ފުރުސަތު ގައުމުގައި އޮތް ކަމާ މެދު ސުވާލު އުފައްދަވާ ހުސެއިން ވަނީ އީސުލްޖުމްހޫރިއްޔާއަކީ ދިވެހިރާއްޖޭގެ މިނިވަންކަމާ، ސިޔާދަތާ އިސްތިގުލާލަށް،އުނިކަން ،ލިބޭނެގޮތައް ކަންކަން ކުރަން ލައިސަންސް ލިބިފައިވާ މީހެއް ނޫންކަން ދިވެހި ސިފައިން ދަންނަން ޖެހޭ ކަމަށް ވެސް ވިދާޅުވެފައެވެ.

ހުސައިން ވިދާޅުވީ މިހާރު އޮތް އެންމެ ބޮޑު ބިރަކީ، ރައީސް މުއިއްޒު އެއްބަސްވުމެއްގައި ސޮއިކޮށް ގައުމުގެ ސިފައިންގެ މައި މަރުކަޒު އެހެން ބަޔަކަށް ދީފާނެކަމުގެ ބިރުކަމަށެވެ. އަދި އެކަން އރގޮތަށް ނުވާނެކަމުގެ އެއްވެސް ގެރެންޓީއެއް، މިހާރު ކަން ވަމުންދާ ގޮތުން ނެތްކަމަށް ވެސް ހުސެއިން ވިދާޅުވިއެވެ.