ސިޔާސީ މުވައްޒަފުންގެ އަދަދު ހާމަކުރަން ގޮވާލާ ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފިއެވެ.

ސަރުކާރުގެ އެކިއެކި ސިޔާސީ މަގާމުތަކަށް ރައީސުލްޖުމްހޫރިއްޔާ އައްޔަނު ކުރައްވާފައިވާ ފަރާތްތަކުގެ މައުލޫމާތު ހާމަ ކުރުމަށް ގޮވާލާ ކުއްލި މައްސަލައެއް މަޖލީހުގެ ތަޅުމަށް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއިލް ނަސީމެވެ.

އެ މައްސަލަ ހުށަހެޅީ އެ ފަރާތްތަކުގެ މުސާރަތައް ކުޑަކުރަން ހުށަހަޅާފައިވާ މި ދަނޑިވަޅުގައި ސިޔާސީ މަގާމުތަކަށް ރައީސުލްޖުމްހޫރިއްޔާ އައްޔަނު ކުރައްވާފައިވާ ފަރާތްތަކުގެ އަދަދާއި އެ ފަރާތްތަކުގެ މަގާމުގެ މަސްއޫލިއްޔަތު ހާމަ ކޮށްދިނުމަށް ރައީސުލްޖުމްހޫރިއްޔާ އާއި ސަރުކާރަށް ގޮވައިލާ ރައްޔިތުންގެ މަޖިލީހުގެ 192 ވަނަ މާއްދާގެ ދަށުންނެވެ.

މީކާއީލް ހުށަހެޅުއްވި އެ ކުއްލި މައްސަލައިގައި ވިދާޅުވެފައިވަނީ ސަރުކާރުގެ ސިޔާސީ މަގާމުތަކުގައި ތިބި މުވައްޒަފުންނާއި ރައީސް ޑރ. މުހައްމަދު މުއިއްޒުގެ އިތުރުން ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން ބައެއް އުނިކުރަން ރައީސް ނިންމެވި ނިންމުމާ ގުޅިގެންކަމަށެވެ.

މީކާއިލް އިތުރަށް ވިދާޅުވީ އެ އެފަދަ ބަދަލެއް ގެންނަން ރައީސް ނިންމަވާފައިވީ ނަމަވެސް ސިޔާސީ މަގާމުތަކުގައި ތިބި މުވައްޒަފުންގެ އަދަދު މިހައިތަނަށް ހާމަ ކޮށްފައި ނެތުމުން ކަމަށެވެ.

މައްސަލަ ބަލައިނުގަންނަން ފާސްކުރީ މަޖިލީހަށް ހާޒިރުވެ ތިއްބެވި 59 މެންބަރުންގެ ވޯޓާ އެކުއެވެ. އެ މައްސަލަ ބަލައިގަންނަން ފެންނަ ކަމަށް ވޯޓު ދެއްވީ އަށް މެންބަރުންނެވެ. އެއްވެސް ކޮޅަކަށް ވޯޓު ދޭން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވައެވެ.

މައުލޫމާތު ހާމަކުރަން ސަރުކާރަް ހުށަހަޅާ މިފަދަ ހުށަހެޅުންތަކަށް ސަރުކާރުން އިޖާބަނުދޭިއރު މިއީ ހާމަކަން ބޮޑުކޮށް ހންގާނެ ސަރުކާރެއްކަމަށް އިންތިހާބުގެ ކުރިންނާ އަދި ހުވާ ކުރައްވާވެސް ރައީސް މުހައްމަދު މުއިއްޒު ވިދާޅުވެފައިވެއެވެ.

މިއަދާ ހަމައަށް އައިއިރު ވެސް މި ސަރުކާރުގައި ތިބި ޖުމްލަ ސިޔާސީ މުވައްޒަފުންގެ އަދަދެއް ނޭނގެއެވެ.

ނަމަވެސް މި ސަރުކާރު ވެރިކަމަށް އައީ 700 އަށްވުރެ ސިޔާސީ މުވައްޒަފުންގެ އަދަދު ގިނަ ނުކުރާނެ ކަމުގެ ވައުދާއެކުއެވެ. އެ އަދަދު 2,000 އާ ގާތްކުރާނެ ކަމަށް އެކި މަސްދަރުތަކުން ހާމަކޮށްފައިވެއެވެ.