ހައުސިންގ ޑިވެލޮޕްމެންޓް ކޯޕަރޭޝަންގެ މެނޭޖިންގ ޑިރެކްޓާރ ފަޒުލް އަހުމަދު ރަޝީދު ހާއްސަ އުސޫލެއްގެ ދަށުން އޭނާގެ އަންހެނުން ހިމެނޭހެން 5 މީހަކަށް ބިން ދިން މައްސަލަ އެންޓި ކޮރަޕްޝަން ކޮމިޝަނަށް ހުށަހަޅައިފި އެވެ.

މައުލޫމާތު ލިބުނުގޮތުގައި އެ މައްސަލަ އޭސީސީއަށް ހުށަހެޅީ އާންމު ފަރާތެކެވެ. އެއީ ކޮންމެހެން ބަލަންޖެހޭ މައްސަލައެއް ކަމަށް ވެސް އެ ފަރާތުން ވަނީ ބުނެފައެވެ.

ހުޅުމާލޭ ދެވަނަ ފިޔަވަހިން 2017 ގައި 42 ބިމެއް ވިއްކަން ހުޅުވައިލި ބީލަމަށް އެޗްޑީސީގެ މިހާރުގެ މެނޭޖިން ޑިރެކްޓަރު ފަޒުލް ރަޝިދުގެ އަންހެނުން، މ. ސާނިޔާ ޒުލްފީނާ ރަޝީދު ހުށަހެޅި އެވެ.

އެ ބީލަމަށް ހުށަހެޅި މީހުންގެ ލިސްޓުގައި އޭނާ އޮތީ 40 ވަނައިގަ އެވެ. ނަމަވެސް, އެ ފަހަރު ބިން ވިއްކީ 36 ފަރާތަކަށް ކަމަށް ވާތީ އޭނާއަށް ބިން ގަންނަން ނުލިބެ އެވެ.

އެ މައްސަލަ ޒުލްފީނާ ސިވިލް ކޯޓަށް ހުށަހެޅި އެވެ. ނަމަވެސް މައްސަލަ އޭނާ އަށް ކާމިޔާބެއް ނުވި އެވެ. ނަމަވެސް، އެޗްޑީސީ ހިންގަން ފަޒްލު ހަވާލުވެވަޑައިގަތުމަށް ފަހު އެންމެ އިސްކަމެއް ދެއްވި އެއް ކަމެއްގެ ގޮތުގައި ނިންމެވީ އަންހެނުންނަށް ބިމެއް ވިއްކުމުގެ މުއާމަލާތް ނިންމުމެވެ.

މިކަމާ ބެހޭ ގޮތުން ރައީސް ޔާމީން ވެސް ވަނީ ފްރޮންޓް އޮފީސް ޖަލްސާތަކުގައި ވާހަކަ ދައްކަވާ މި މައްސަލަ ބެލުމަށް އޭސީސީއަށް ގޮވާލާފައެވެ.