ރައްޔިތުންގެ މަޖިލިސް އިންތިހާބުގައި އޮބްޒާވަރުންނާއި މޮނިޓަރުންނަށްވުމުގެ ފުރުސަތު ހުޅުވާލައިފިއެވެ.
އީސީއިން ކުރި އިއުލާނެއްގައި ބުނެފައިވަނީ ފުރުސަތު ހުޅުވާލައިފައިވަނީ ޖަނަވަރީ މަހުގެ 31 ވަނަ ދުވަހުން ފެށިގެން މި މަހުގެ 19 ވާ ހޯމަ ދުވަހުގެ 15:00 އާ ހަމައަށް ކަމަށެވެ.
އޮބްޒާވަރުންނާއި މޮނިޓާރުންނަށް ޝައުގުވެރިވާ ފަރާތްތަކުގެ ފޯމު ބަލައިގަތުމަށް ހަމަޖެހިފައިވަނީ މެއިލް މެދުވެރިކޮށާ ދަރުބާރުގޭގައި ހުންނަ އިންތިހާބާ ބެހޭ މަރުކަޒުގެ ރިސެޕްޝަނުންނެވެ.
ފޯމް ބަލައިގަތުމުގެ އިންތިޒާމު ފެބުރުއަރީ 19 ގެ ނިޔަލަށް، ރަސްމީ ބަންދު ނޫން ކޮންމެ ދުވަހަކު ހެނދުނު 09:00 އިން މެންދުރުފަހު 03:00 އަށް ހަމަޖެހިފައިވާނެ ކަމަށް އީސީގެ އިއުލާންގައި ވަނީ ހާމަކޮށްފައެވެ.
ރަސްމީ ބަންދު ދުވަސްތަކުގައި ހެނދުނު 09:00 އިން މެންދުރުފަހު 03:00 އަށް ފޯމު ބަލައިގަތުން ކުރިއަށް ގެންދިއުމަށް ނިންމާފައިވާއިރު ހުކުރު ދުވަހު މެންދުރުފަހު 03:00 އިން ހަވީރު 05:00 އަށް ވެސް އެ އިންތިޒާމު ހަމަޖެހިފައިވާނެކަމަށް އީސީއިން ވަނީ ބުނެފައެވެ.
އޮބްޒާވަރުންނަށް ކުރިމަތިލާ ފަރާތްތަކުގައި ހުންނަން ޖެހޭ ޝަރުތުތަކުގެ ތެރޭގައި 18 އަހަރު ފުރިފައިވާ ދިވެއްސެއް ކަމުގައިވުމާއި، ޖިނާއީ ކުށެއްގެ ހުކުމް ތަންފީޒު ކުރެވެމުންދާ މީހެއް ކަމުގައިނުވުމާއި، ސިޔާސީ ޕާޓީތައް ފިޔަވައި މަދަނީ ޖަމާއަތަކުން ނުވަތަ އަމިއްލަ ގޮތުން އޮބްޒާވަރަކަށް ވުމަށް ހުށަހަޅާ ފަރާތެއްނަމަ، ސިޔާސީ ޕާޓީއެއްގެ ރަޖިސްޓަރީއެއްގައި އެ މީހެއްގެ ނަން ހިމެނިފައިވާ މީހަކު ކަމުގައިނުވުން ހިމެނެއެވެ.
މީގެ އިތުރުން އިންތިޚާބާ ބެހޭ މަސައްކަތެއް ކުރުމަށް އީސީން ހަވާލުވެގެން ހުރި މީހެއް ކަމުގައިނުވުމާއި، އިންތިޚާބުގައި ހަރަކާތްތެރިވާ ފަރާތްތަކަށް އީސީއިން ކަނޑައަޅައިފައިވާ ސުލޫކީ މިންގަނޑު ކިޔައި، އެއާ އެއްގޮތަށް އަމަލުކުރުމަށް އެއްބަސްވެ އިގުރާރުވެފައިވާ މީހަކު ކަމުގައިވުމާއި، ފާއިތުވި ފަސް އަހަރު ދުވަހުގެ ތެރޭގައި ސުލޫކީ މިންގަނޑާ ޚިލާފުވެގެން ފިޔަވަޅެއް އަޅައިފައިވާ މީހަކު ކަމުގައި ނުވުން ނުވަތަ އިންތިޚާބީ ކުށެއް ސާބިތުވެފައިވާ މީހަކު ކަމުގައި ނުވުން ވެސް ޝަރުތުތަކުގެ ތެރޭގައި ހިމެނެއެވެ.
މޮނިޓަރުންނަށް ކުރިމަތިލާ ފަރާތްތަކުގެ ކިބައިގައި ހުންނަން ޖެހޭ ޝަރުތުތަކުގެ ތެރޭގައި މޯލްޑިވްސް ބްރޯޑްކާސްޓިންގ ކޮމިޝަނުގައި ރަޖިސްޓަރީ ކޮށްފައިވާ ރޭޑިއޯ ނުވަތަ ޓީވީ ސްޓޭޝަނެއްގައި މަސައްކަތްކުރާ މީހެއްކަން ކަށަވަރުވުމާއި ނުވަތަ ނޫސް މަޖައްލާފަދަ ތަކެތީގެ ގާނޫނުގެ ދަށުން ރަޖިސްޓަރީކޮށްފައިވާ ނޫސް، މަޖައްލާއެއްގައި މަސައްކަތް ކުރާ މީހެއްކަން ކަށަވަރުވުން ހިމެނެއެވެ.
ޝައުގުވެރިވާ ފަރާތްތަކުން ފޯމު މެއިލްކުރާނީ އީސީގެ [email protected] އީ-މެއިލަށެވެ. އެޕްލިކޭޝަން ފޯމު elections.gov.mv އިން ލިބޭނެއެވެ.
