4000 ފުލެޓު ލިބޭ މީހުންގެ ލިސްޓު މި ހަފުތާ ނިމުމުގެ ކުރިން އިއުލާނު ކުރައްވާނެ ކަމަށް ހައުސިން މިނިސްޓަރު، އަލީ ހައިދަރު ވިދާޅުވެއްޖެ އެވެ.

ހައިދަރު މިފަދައިން ވިދާޅުވެފައި ވަނީ އޮންލައިން ނޫހަކަށް ދެއްވި އިންޓަވިޔުއެއްގައެވެ.

އެގޮތުން އޭނާ ވިދާޅުވީ އެއްވެސް ދައްޗެއް ކުރިމަތި ނުވާ ކަމަށް ވަންޏާ މި ހަފުތާ ތެރޭ ފްލެޓް ލިސްޓް އާންމު ކުރެވިގެންދާނެކަމަށެވެ.

މިދިޔަ ޖުލައި 29، ގައި ރައްޔިތުންގެ މަޖިލީހުގެ ޕެޓިޝަން ކޮމެޓީއަށް މިނިސްޓަރު ހައިދަރު ހާޒިރުކޮށް ސުވާލު ކުރުމުން އޭނާ ވިދާޅުވީ މަސައްކަތް ކުރަމުން ދަނީ ގެދޮރުވެރިޔާ ސްކީމުގެ ދަށުން ދޫކުރުމަށް އަޅާ އިމާރާތްތަކުގެ މަސައްކަތްތައް ނިމުމުގެ ކުރިން ފުލެޓު ލިބޭ މީހުންގެ ފައިނަލް ލިސްޓެއް އެކުލަވައިލެވޭތޯ ކަމަށެވެ.

އަދި އޮކްޓޯބަރު މަސް ނިމުމުގެ ކުރިން ލިސްޓު އެކުލަވާލާނެކަމަށެވެ. އެހެންނަމަވެސް ފްލެޓް ލިސްޓް އާންމު ނުކުރުމާ ގުޅިގެން ގިނަ ބަޔަކު އަންނަނީ ސަރުކާރާ ދެކޮޅަށް މުޒާރާ ކުރަމުންނެވެ.