ވަޒީފާގެ ބިރު ދައްކާ ޕީއެންސީއަށް ޕީޕީއެމްގެ އާންމު މެމްބަރުން ވައްދަމުން ގެންދާތީ ޕީއެންއެފްގެ ސެކެޓްރީ ޖެނެރަލް މުހައްމަދު މަލީހް ޖަމާލް ފާޑުވިދާޅުވެއްޖެ އެވެ.

މަލީހް މިފަދައިން ވިދާޅުވެފައި ވަނީ އެކްސްގައި ކުރެއްވި ޕޯސްޓެއްގައެވެ.

ކޮންގްރެސް ޕާޓީގެ މެންބަރޝިޕް އިތުރު ކުރުމަށް މާލެސިޓީގައި މިއަދު ކުރިޔަށް ގެންދެވޭ ހަރަކާތުގެ ތެރެއިން ޕީޕީއެމްގެ އާންމު މެމްބަރުން ޕީއެންސީއަށް ވައްދަން ތިޔަ ކުރައްވަނީ ޤާނޫނު އަސާސީއާއި ޚިލާފު ޢަމަލެއް ކަމަށް މަލީހް ވަނީ ވިދާޅުވެފައެވެ.

އެގޮތުން ޕީޕީއެމްގެ މެމްބަރުން ގަދަބާރުން ޕީއެންސީއެއް ވެއްދުމުގެ ނަތީއްޖާއަކަށް ވާނީ ސިއްރު ވޯޓުގައި ރައީސް މުއިއްޒަށް ވޯޓް އެ ފަރާތްތަކުން ނުލުންކަމަށް ވިދާޅުވެ މަލީހް ވަނީ ވަރަށް ބޮޑަށް ފާޑު ވިދާޅުވެފައެވެ.

މަލީހް އިތުރަށް ވިދާޅުވީ ޕީއެންސީއަށް މެމްބަރުން ގިނަ ކުރުމަށް ރައީސް މުއިއްޒު މަސައްކަތްކުރަނީ ޕާޓީތަކަށް ދޭ ފައިސާގެ ދަހިވެތިކަމުގައިކަމަށެވެ. މަލީހް ވަނީ ރައީސް މުއިއްޒުގެ އެ އަމަލުފުޅަކީ ލަދުވެތިކަމެއްގެ ގޮތުގައި ސިފަކުރައްވާފައެވެ.