ސަރުކާރު ހިންގާ ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އިން މީހުންގެ ޣައިރު ހާޒިރުގައި ސޮއި ފޯޖްކޮށްގެން ޕާޓީއަށް ފޯމް ފުރާތީ ޕީއެންއެފްގެ ސެކެޓްރީ ޖެނެރަލް މުހައްމަދު މަލީހް ޖަމާލް ފާޑުވިދާޅުވެއްޖެ އެވެ.
މަލީހް އެކްސްގައި ކުރެއްވި ޕޯސްޓެއްގައި ވިދާޅުވީ މީހުންގެ ސޮއެ ފޯޖްކޮށްގެން ޕާޓީއަށް ވެއްދުމަކީ ޤާނޫނީ ކުށެއްކަމަށެވެ.
މިކަން ބައްލަވާ ހުއްޓުވާ ފިޔަވަޅު އަޅަންޖެހޭނެކަމަށް ވެސް މަލީހް ވަނީ ގޮވާލާފައެވެ. މިއީ ސަރުކާރުން ޕާޓީތަކަށް ދޭ ލާރި އެއްކޮށް ދިރުވާލަން ރައީސް މުއިއްޒު ޖައްސަވާ ސަކަރާތެއްކަމަށް ވެސް މަލީހް އޭނާގެ ޕޯސްޓްގައި ވަނީ ވިދާޅުވެފައެވެ.
އޭގެއިތުރުން މަލީހް ވިދާޅުވީ ޕާޓީ ތަކަށް މިގޮތަށް މީހުން ވެއްދުމަކީ ނާތަހުޒީބު ޢަމަލެއްކަމަށެވެ.
ޕީއެންސީގެ ބައެއް ފަރާތްތަކުން މީހުންގެ ސޮއި ފޯޖްކޮށް ފޯމް ފުރަމުންދާކަމަށް ބުން ސޯޝަލް މީޑިއާގައި ފާޑުކިޔުން ވަނީ އަމާޒުވެފަ އެވެ.
އެގޮތުން މީހަކު އެކްސްގައި ފޮޓޯ ތަކަކާއެކު ހިއްސާކޮށްފައިވާ ޕޯސްޓެއްގައި ސަރުކާރުގެ ސިޔާސީ މަގާމުތަކުގައި ތިބި ބައެއް މީހުނާއި ޕާޓީގެ ބައެއް ފަރާތްތަކުން ލިސްޓްތަކެއް ހިފައިގެން ތިބެ ފޯމް ފުރުމުގެ މަސައްކަތް ކުރާތަން ފެނެ އެވެ.
މައުލޫމާތު ލިބުނުގޮތުގައި އެކަން ކުރަމުން ދަނީ ޕީޕީއެމްގެ ގިނަ މެންބަރުން ޕާޓީ ބަދަލުކުރަން ދެކޮޅު ހަދަމުން ދިޔުމާއެކު، ޕީއެންސީއަށް ބޭނުންވާ އަދަދަށް ފޯމް ހަމަކުރުމަށް ގޮންޖެހުންތަކާއި ކުރިމަތިވެފައިވާތީއެވެ.
