އިންޑިއާގެ އަސްކަރީ ދެ އުޅަނދެއް ހުއްދަ ނެތި ރާއްޖޭގެ ސަރަހައްދަށް ވަދެ ދިވެހި މަސްދޯނި ފަހަރަށް އިންޑިއާ ސިފައިން އެރި މައްސަލަ ތަހުގީގުކުރަން ފަށައިފިއެވެ.

ބުދަ ދުވަހު އިންޑިއާގެ ދެ އުޅަނދެއް ރާއްޖޭގެ އިގްތިސާދީ ހާއްސާ ސަރަހައްދުގެ ތެރެއަށް ވަނީ ވަދެފައެވެ. އަދި އެ އުޅަނދުތަކުގައި ތިބި ސިފައިން ވަނީ ދިވެހި 3 މަސްދޯންޏަކަށް އަރައި ފަޅުވެރިންނާ ސުވާލުކޮށް ބިރުދައްކާފައެވެ.

އިންޑިއާ ސިފައިން ދިވެހި މަސްދޯންޏަށް އަރާފައިވަނީ ރާއްޖޭގެ އުތުރުގެ އިގްތިސާދީ ހާއްސާ ސަރަހައްދުގެ ތެރޭގައި މަސްވެރިކަން ކުރަމުން ދަނިކޮށެވެ. މީގެ އިތުރުން ރާއްޖޭގެ އިގްތިސޯދީ ހާއްސަ ސަރަހައްދަަށް އިންޑިއާގެ އުޅަދުތައް ވަނީ ދިވެހި ސަރުކާރަށް އަންގައި ހުއްދަ ހޯދައިގެންނެއް ނޫން ކަން ވެސް ފާހަކޮށްލެވެއެވެ.

ސަރުކާރުގެ އޮފިޝަލަކާ ހަވާލާ ބައެއް މީޑިޔާތަކުގައި ރިޕޯޓުކޮށްފައިވާ ގޮތުގައި މި ދެ އުޅަނދު ރާއްޖޭގެ ސަރަހައްދަށް ވަން މައްސަލަ ތަހުގީގުކުރުމުގެ މަސައްކަތް ހިނގަމުންދާ ކަމަށެވެ.