ގެދޮރުވެރިޔާ ސްކީމްގެ ދަށުން 4000 ފްލެޓް ލިބޭ މީހުންގެ ލިސްޓް އިއުލާނުކުރުން އަނެއްކާވެސް ފަސްކޮށްފި އެވެ.

ހައުސިން މިނިސްޓްރީން މިފަދައިން ބުނެފައި ވަނީ މިއަދު އެ ވުޒާރާއިން ނެރުނު ނޫސްބަޔާނެއްގައި އެވެ.

އެގޮތުން އެ ވުޒާރާއިން ބުނެފައިވަނީ ރައީސުލްޖުމްހޫރިއްޔާގެ ލަފާފުޅުގެ މަތިން އެކުލަވާލި "ހައުސިން އެޑްވައިޒަރީ ކޮމިޓީ" އާއި މާލޭ ސިޓީ ކައުންސިލުން އެކުލަވާލި "ހައުސިން ކޮންސަލްޓެޓިވް ކޮމިޓީ" އިންވެސް ގެދޮރުވެރިޔާ ސްކީމުގެ ދާއިމީ ލިސްޓް އެކުލަވާލާފައިވާ ގޮތް ރަނގަޅުކަމަށް ނުފެންނާތީ ލިސްޓް އާންމުކުރުން ފަސްކުރީ ކަމަށެވެ.

އެ ބަޔާނުގައި އިތުރަށް ބުނީ މި ސްކީމްގެ ދަށުން ހުށަހަޅާފައިވާ ހުރިހާ އެޕްލިކޭޝަން ފޯމުތައް ރީ- އިވެލުއޭޓްކުރުމުގެ މަސައްކަތް މިނިސްޓްރީން ވަނީ ފަށާފައިވާ ކަމަށެވެ.

އަދި މި މަސައްކަތްތައް ފުރިހަމައަށް ނިންމާލުމަށް އިތުރު ވަގުތު ބޭނުންވާތީ، މި އަހަރުގެ ނޮވެމްބަރު މަހުގެ ދެވަނަ ހަފްތާގެ ނިޔަލަށް ވަގުތީ ލިސްޓް އާންމު ކުރުމުގެ މަސައްކަތްތައް މިނިސްޓްރީއިން ކުރަމުންދާނެ ކަމަށެވެ.

އެ މިނިސްޓްރީން އެކި ފަހަރު މަތިން ފްލެޓް ލިސްޓު އާންމުކުރުން ވަނީ ފަސްކޮށްފައެވެ.މި ހަފްތާ ތެރޭގައި ފްލެޓް ލިސްޓް އާންމުކުރުމުގެ މައްސަކަތް ކުރަމުންދާކަމަށް ހައުސިން މިނިސްޓަރު އަލީ ހައިދަރު ވަނީ މީގެ ދެ ދުވަސް ކުރިން ވިދާޅުވެފަ އެވެ.

މިދިޔަ ޖުލައި މަހުން ފެށިގެން ފްލެޓް ލިސްޓް އާންމުކުރާނީ އޮކްޓޯބަރު މަހުގައި ކަމަށް ބުނަމުން ގޮސް، އޮކްޓޯބަރު މަސް ނިމެން ކައިރިވުމުން މިވަނީ އަނެއްކާވެސް ނޮވެމްބަރަށް ބަދަލުކޮށްފަ އެވެ.

މިކަމާ ގުޅިގެން ފުލެޓް ދިނުމުގެ ނިޔަތެއް ސަރުކާރުގައި ނެތްކަމަށް ވެސް ގިނަ ބަޔަކު އަންނަނީ ބުނަމުންނެވެ.