ވެރިކަމަށް ވަޑައިގަތުމަށް ރައީސް ޑރ މުއިއްޒު ދެއްކެވިހާ ވާހަކަތަކަކީ ދޮގުތަކެއްކަން ހާމަވަމުން ދާކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހްމަދު ވިދާޅުވެއްޖެއެވެ.

މިގޮތުން ރައީސް މުއިއްޒު ވައުދުވެ ވަޑައިގެންނެވި ކަންތައްތަކުގެ ވީޑިއޯއެއް އެމަނިކުފާނުގެ އެކްސް އެކައުންޓްގައި ޝެއަރ ކުރައްވަމުން ވިދާޅުވީ ރައްޔިތުން މުއިއްޒުއަކީ ދޮގުވެރި "ކައްޒާބެއް" ކަމަށް ސިފަ ކުރައްވަނީ މިހެންވެގެން ކަމަށެވެ.

މުއިއްޒު އޭރު ވިދާޅުވީ މިނިވަން މުއައްސަސާތަކަކީ ހަމަ އެކަނި ކަރުދާހެއްގައި ނަމަކަށް އޮންނަ މުއައްސަސަތަކަށް ވެގެން ހަމަޖައްސާލެވެން ނެތް ކަމަށެވެ. އަދި ދިވެހީންގެރާއްޖޭގެ ސަރުކާރެއްގައި މިނިވަން މުއައްސަސާތަކަކީ ހަގީގީ މާނައިގައި އޮޕަރޭޓް ކުރަމުންދާނެ ތަންތަން ކަމަށް މުއިއްޒު ވިދާޅުފައިވާއިރު، މިހާރު އޮތް އެންމެ މުހިންމު ދެ މިނިވަން މުއައްސަސާ ކަމުގައިވާ އިލެކްޝަންސް ކޮމިޝަން އަދި އެންޓި-ކޮރަޕްޝަން ކޮމިޝަންގެ ރައީސުންނާއި ނައިބު ރައީސުން އައްޔަންކުރުމުގެ ބާރު ރައީސުލްޖުމްހޫރިއްޔާއަށް ދިނުމަށް ސަރުކާރުން ވަނީ މަޖިލީހަށް ބިލު ހުށަހަޅާފައެވެ.

މިކަމުގެ ސަބަބުން އިންސާފުވެރި އިންތިހާބު ބޭއްވުމުގެ ދޮރު އެކީ އެކައްޗަކަށް ރާއްޖޭގައި ބަންދުވީއެވެ. އަދި މުއިއްޒުގެ މައްޗަށް ތުހުމަތު ކުރެވޭ އެއްވެސް މައްސަލައެއް ބެލުމުގެ ބާރު ގެއްލިގެން ދާނެއެވެ.

މުއިއްޒުގައި އުފަންވެގެން އުޅޭ ދެމޫނުގެ ވެރި ޑިކްޓޭޓަރެއްގެ ގޮތުގައި ރައްޔިތުން ސިފަކުރަމުންދަނީ މިފަދަ ކަންތައްތަކުގެ ސަބަބުން ކަމަށް ޖަމީލް ވަނީ ވިދާޅުވެފައެވެ.